Kergja vegna Rangársels í Seljahverfi – „Þetta getur ekki talist góð stjórnsýsla“
Í vikunni munu tveir einstaklingar flytja inn á neðri hæð íbúðakjarna við Rangársel 16–20 í Seljahverfi í Breiðholti. Það væri ekki í frásögur færandi nema fyrir þá staðreynd að nágrannar hafa fylgst með miklum endurbótum á húsnæðinu sem lítur núna helst út sem lítið öryggisfangelsi þökk sé þriggja metra háum girðingum og fjölmörgum öryggismyndavélum.
Íbúar í nágrenni við íbúðakjarnann eru ósáttir við feluleik Reykjavíkurborgar vegna starfseminnar en engin kynning hefur átt sér stað um hvaða starfsemi verði þar. „Okkur var lofað því að hættulegir einstaklingar yrðu ekki vistaðir þarna og að íbúum yrði haldið upplýstum,“ segir Regína María Sigurðardóttir, sem býr í næsta nágrenni. Þá segir hún íbúana telja að Reykjavíkurborg sé að brjóta lög með því að afla ekki tilskilinna leyfa fyrir framkvæmdunum.
Deilur íbúa í hverfinu og Reykjavíkurborgar vegna íbúðakjarnans í Rangárseli eiga sér nokkra sögu. Um árabil dvöldust hreyfihamlaðir einstaklingar í húsnæðinu á vegum Öryrkjabandalags Íslands og gekk það sambýli afar vel. Í lok árs 2014 keyptu Félagsbústaðir hf. fasteignina og skömmu síðar dró ský fyrir sólu.
Upp úr sauð í maí 2015 þegar fjölmennur íbúafundur var haldinn í Seljakirkju. Þá hafði spurst út að fyrirhugaðar væru þær breytingar að fólk með fíkniefnavanda fengi athvarf í Rangárseli. Yfir því voru íbúar í hverfinu uggandi. Ásamt íbúum mættu fjölmargir borgarfulltrúar á fundinn og var fundargestum heitt í hamsi. Engum þó heitara en Björk Vilhelmsdóttur, þáverandi formanni velferðarráðs Reykjavíkurborgar, sem jós skömmum yfir fundargesti fyrir að ákveða fyrirfram hegðun fólks til framtíðar og tala niður þá sem minnst máttu sín í samfélaginu. Þá var hún sérstaklega ósátt við sóknarprest Seljakirkju fyrir að lána guðshús undir slíkan fund.
„Við héldum þennan fund fyrst og fremst vegna þess að við fengum engar upplýsingar frá borginni um hvaða starfsemi ætti að vera í húsinu. Eftir nokkra fundi með starfsmönnum borgarinnar þá var okkur lofað að hættulegir einstaklingar yrðu ekki vistaðir þarna. Þannig róaðist málið um skeið en núna á að lauma starfseminni inn í skjóli nætur. Reykjavíkurborg hefur ekki upplýst nágranna á neinn hátt um hvaða starfsemi verður í húsinu og á meðan fylgjumst við með því hvernig húsnæðinu er breytt og lítur núna út eins og öryggisfangelsi. Eðli málsins samkvæmt spyr maður sig hvaða starfsemi þarf slíka öryggisgæslu,“ segir Rebekka María.
Rebekka María hefur svo sannarlega ástæðu til þess að vera uggandi varðandi störf Reykjavíkurborgar því um mitt ár 2015 varð hún fyrir fólskulegri líkamsárás af hálfu andlega veikrar konu sem vistuð var í Rangárseli. „Það fluttu tveir íbúar inn í Rangárselið árið 2015. Kona og karl sem bæði glímdu við andleg veikindi. Til að byrja með var gæslan í kringum þau afar slök og þau ollu talsverðum usla í hverfinu. Maðurinn glímdi við strípihneigð sem fór ekki framhjá okkur nágrönnunum og varð meðal annars til þess að farið var fram á að sett yrði speglagler í glugga byggingarinnar. Þá fékk konan að ganga óáreitt um hverfið, sem var ámælisvert því hún var mjög árásargjörn. Meðal annars bankaði hún upp á hjá mér og kýldi mig þegar ég kom til dyra,“ segir Rebekka María, sem hlaut talsverða áverka við árásina. Hún lagði inn kæru mánuði síðar sem varð ekki síst til þess að þrýsta á breytingar.
„Þessir einstaklingar búa enn í íbúðakjarnanum en gæslan í kringum þá hefur tekið stakkaskiptum. Síðan fluttust inn einhverfir einstaklingar í húsið og sú sambúð hefur verið frábær þannig að starfsemin var komin í ágætan farveg. Miðað við breytingarnar á húsinu þá er greinilegt að hættulegir einstaklingar verða vistaðir þarna og það er með hreinum ólíkindum að íbúar í hverfinu séu ekki upplýstir um fyrirhugaða starfsemi,“ segir Rebekka.
Að hennar mati þá er líka vafamál hvort framkvæmdir borgarinnar standist hreinlega lög. „Borgin reisir þarna fjögurra metra hátt grindverk fyrir framan húsið og gerir umtalsverðar skipulagsbreytingar á húsinu. Íbúar hér í kring hafa leitað eftir upplýsingum hjá skipulagsyfirvöldum um hvort að tilskilin leyfi séu til staðar en svo virðist ekki vera. Þetta getur ekki talist góð stjórnsýsla,“ segir Rebekka María.
Í svari frá Regínu Ástvaldsdóttur, sviðsstjóra Velferðarsviðs Reykjavíkurborgar, kemur fram að framkvæmdirnar á neðri hæð hússins séu vegna tveggja einstaklinga sem muni flytja inn á næstu dögum. „Þeir verða með mjög mikla mönnun og sérstakan forstöðumann,“ segir Regína. Hún segist ekki geta svarað því hvort íbúarnir séu með dóm á bakinu eða hvort þeir hafi verið metnir ósakhæfir. „Mér er ekki heimilt að að segja frá einkamálefnum þess fólks sem við vinnum með,“ segir Regína.
Þá segir hún að borgin veiti fóki sem á í vanda þjónustu út um alla borg enda sé það svo að lög um málefni fatlaðra kveði beinlínis á um að íbúðir fyrir þessa einstaklinga skuli vera íbúabyggð og nálægt almennri og opinberri þjónustu. „Við munum gera allt sem í okkar valdi standi til að tryggja öryggi þessara tilteknu íbúa og starfsfólks,“ segir Regína.
Þá segir Regína að starfsemin verði ekki sett af stað fyrr en búið sé að fá leyfi hjá byggingarfulltrúa fyrir girðingunum sem umlykur neðri hæð hússins.
