„Loks langar mig að lýsa yfir vonbrigðum mínum með það hversu margar stúlkur virðast vera farnar að nota munntóbak,“ segir Hjalti Jón Sveinsson, skólameistari Kvennaskólans í Reykjavík, í orðsendingu í tölvupósti til nemenda.

Þar minnir Hjalti Jón nemendur Kvennaskólans á skólareglur sem meðal annars kveða á um að notkun hvers kyns tóbaks, þar með talið reyktóbaks, neftbókas og munntóbaks, sé stranglega bönnuð í húsakynnum skólans, á lóð hans og samkomum og ferðum á vegum hans.

Það vakti athygli nemenda að Hjalti Jón tiltók sérstaklega að hann hefði orðið fyrir vonbrigðum með það hversu margar stúlkur virðast vera farnar að nota munntóbak. Einhverjir voru ósáttir við þetta orðalag og túlkuðu það á þá leið að strákar mættu frekar taka í vörina en stúlkur.

Í samtali við DV kveðst Hjalti Jón alls ekki hafa verið að meina það – munntóbaksneysla hafi aukist mikið á undanförnum árum og það sé ekki af hinu góða, breytir þá engu hvort drengir eða stúlkur noti munntóbak.

„Ég er búinn sem skólastjóri að berjast gegn tóbaksnotkun í mörg ár. Ég hef alltaf verið þeirrar trúar að það væru piltar sem tækju í vörina og staðið í þeirri trú að fáar stúlkur notuðu munntóbak. Nú hef ég fengið vísbendingar um að útbreiðsla munntóbaksneyslu meðal stúlkna sé orðin veruleg. Það kemur mér á óvart og auðvitað veldur það mér vonbrigðum,“ segir hann.

„Það voru einhverjar stúlkur sem misskildu mig, en auðvitað var ég að lýsa yfir almennum vonbrigðum á útbreiðslu munntóbaks. Það er ekki svo að skilja að strákar megi frekar taka í vörina,“ segir Hjalti Jón og bætir við að hann hafi sent nemendum annan tölvupóst þar sem hann áréttaði þetta.