Þar skrifar Elín um fyrirhugaðar framkvæmdir við hjúkrunarheimilið Sóltún , en til stendur að byggja nýja hæð ofan á húsið auk viðbyggingar. Eiga framkvæmdir að hefjast á þessu ári og standa fram á árið 2027.
Fasteignin er í eigu fasteignafélagsins Heima, sem áður hét Reginn, og samkvæmt heimasíðu Sóltúns er markmiðið með framkvæmdunum að uppfæra húsnæðið miðað við nútímakröfur heilbrigðisstofnunar.
Aldraður faðir Elínar er búsettur í Sóltúni og óttast Elín um velferð hans og annarra íbúa hjúkrunarheimilisins á meðan á framkvæmdum stendur.
„Enn skýtur þessi vonda hugmynd upp kollinum, að byggja heila hæð ofan á hjúkrunarheimilið við Sóltún 2 í Reykjavík, og láta aldraða og veika búa í húsinu á meðan á framkvæmdum stendur,“ segir Elín í grein sinni.
Elín bendir á að faðir hennar sé níræður og greiði 530 þúsund krónur á mánuði fyrir dvöl og umönnun í Sóltúni.
„Hver passar upp á hans hagsmuni í þessu máli? Hann hefur ekki einu sinni verið spurður. Er hann réttlaus af því að hann býr á hjúkrunarheimili? Eiga heimilismenn ekki að fá að eyða síðustu ævikvöldunum í næði og með reisn,“ spyr hún og er ómyrk í máli.
„Ég fullyrði að þessi framkoma er brot á mannréttinum, friðhelgi heimilis og einkalífs, auk brota á svokölluðum OPCAT samningi sem Umboðsmaður Alþingis sér um að framfylgja. OPCAT er valfrjáls bókun við samning Sameinuð þjóðanna sem Íslendingar eru aðilar að til að m.a. sporna við ómannlegri eða vanvirðandi meðferð á fólki. Á sama tíma les maður á heimasíðu Sóltúns að öryggi og vellíðan séu æðstu markmið starfseminnar í húsinu. Þetta gengur engan veginn upp?“
Elín skrifaði einnig grein um málið í fyrra þar sem hún sagði ljóst að byggingaframkvæmdirnar muni skapa mikla vanlíðan meðal íbúa vegna hávaða og mengunar sem þeim mun fylgja.
„Fæst okkar sem hraust erum höfum áhuga á því að búa í húsnæði sem er í smíðum hvað þá sjúklingarnir í Sóltúni sem eru afar viðkvæmur hópur sem er að ljúka sínu ævikvöldi. Síðustu ævidagarnir verða því afar nöturlegir við þessar aðstæður, svo ekki sé fastar að orði kveðið.“
