„Kæri kjós­andi. Ef­laust ertu þreytt­ur á inn­an­tóm­um kosn­ingalof­orðum. Við þig vil ég segja að þú þarft ekki að ef­ast um heil­indi Flokks fólks­ins,“ segir Inga Sæland, formaður Flokks fólksins, í aðsendri grein í Morgunblaðinu í dag.

Í henni fer hún yfir helstu kosningaloforð flokksins komist hann í ríkisstjórn og lýsir því hvernig flokkurinn mun fjármagna þau.

Í grein sinni segir Inga að stjórnvöld hafi svikið öryrkja og ellilífeyrisþega í kjölfar hrunsins. Lífeyrir þeirra hafi verið skertur af „hrunstjórninni“ til að uppfylla óskir Alþjóðagjaldeyrissjóðsins. Því hafi þó verið lofað að þær skerðingar yrðu leiðréttar um leið og þjóðarskútan væri komin á lygnari sjó. „Það var lygi,“ segir hún.

Svikin loforð

„Þess í stað máttu ör­yrkj­ar og aldraðir horfa upp á kjör sín versna ár frá ári með til­liti til launaþró­un­ar. Fleiri voru lof­orðin sem stjórn­völd sviku. Frægt er orðið bréfið sem Bjarni Bene­dikts­son sendi öll­um eldri borg­ur­um í aðdrag­anda kosn­ing­anna 2013, þar sem hann lofaði að af­nema tekju­teng­ing­ar elli­líf­eyr­is. Hverj­ar voru efnd­irn­ar eft­ir að hann komst í rík­is­stjórn? Eng­ar,“ segir hún.

Inga bendir á að frá stofnun hafi Flokkur fólksins barist fyrir því að uppsöfnuð kjaragliðnun ör­orku- og elli­líf­eyr­isþega verði leiðrétt.

„Við höf­um lagt fram fjölda þing­mála sem miða að því að bæta stöðu líf­eyr­is- og al­manna­trygg­ingaþega og koma í veg fyr­ir það órétt­læti og arðrán sem á sér stað á kjör­um þeirra hvern ein­asta dag í gild­andi kerfi,“ segir hún.

Þetta ætlar flokkurinn að gera

Inga bætir við að ef Flokkur fólksins kemst í næstu ríkisstjórn verði það forgangsmál að hækka grunn­fram­færslu al­manna­trygg­inga þannig að all­ir ör­yrkj­ar og elli­líf­eyr­isþegar fái 450.000 kr. á mánuði skatta- og skerðing­ar­laust. Sú fjár­hæð taki breyt­ing­um ár hvert til sam­ræm­is við launaþróun eins og hún birt­ist í launa­vísi­tölu.

„Flokk­ur fólks­ins mun af­nema skerðing­ar á elli­líf­eyri vegna at­vinnu­tekna og hækka frí­tekju­mark elli­líf­eyr­is vegna líf­eyristekna í 100.000 kr. á mánuði. Öryrkj­um tryggj­um við tæki­færi til að vinna í tvö ár án tekjuskerðinga og án þess að ör­orka þeirra verði end­ur­met­in,“ segir Inga sem fer svo yfir það hvernig þetta verður fjármagnað.

„Ef­laust spyrja ein­hverj­ir – en Inga, hvernig ætl­ar þú að fjár­magna þetta? – Það er ein­falt – við ætl­um að sækja fé þangað sem nóg er fyr­ir – með hækk­un banka­skatts – með hækk­un auðlinda­gjalda á stór­út­gerðina og með af­námi und­anþágu staðgreiðskyldu líf­eyr­is­sjóðanna. Þá vilj­um við ekki aðeins gera breyt­ing­ar sem lúta að rétt­inda­flokk­um al­manna­trygg­inga­kerf­is­ins – við vilj­um efla mann­rétt­indi eldra fólks og ör­yrkja. Við mun­um lög­festa samn­ing Sam­einuðu þjóðanna um rétt­indi fatlaðs fólks, til að tryggja fötluðu fólki þá sjálf­sögðu rétt­ar­vernd sem samn­ing­ur­inn mæl­ir fyr­ir um. Við mun­um einnig stofna embætti hags­muna­full­trúa eldra fólks, svo að eldra fólk geti leitað til síns eig­in mál­svara sem veit­ir þeim hags­muna­gæslu gagn­vart stjórn­völd­um og vinn­ur gegn fé­lags­legri ein­angr­un þeirra.“

Inga segir að lokum að flokkurinn hafi með baráttu sinni á alþingi sýnt hvar hjarta hans slær.

„Við höf­um óum­deilt látið verk­in tala og í ykk­ar umboði mun­um við hrinda þeim í fram­kvæmd.“