Miklar deilur hafa sprottið upp vegna upptöku blaðamanns Víkurfrétta á lokuðum fundi ráðherra og þingmanna með atvinnurekendum í Grindavík. Á fundinum stóð einn veitingamaður upp og húðskammaði Sigurð Inga Jóhannsson fjármálaráðherra.
Auk Sigurðar Inga var Guðrún Hafsteinsdóttir, dómsmálaráðherra, viðstödd fundinn sem haldinn var á fimmtudag. En á fundinum var meðal annars rætt um aðgerðir stjórnvalda fyrir fyrirtækin í bænum og aðgengi að bænum.
Í frétt Víkurfrétta var greint frá því að eigandi veitingastaðarins Fish House hafi staðið upp og lesið Sigurði Inga pistilinn þegar hann var að halda tölu. Var birt myndband af atvikinu. Sagði eigandinn meðal annars að stjórnvöld væru hætt að styrkja fyrirtækin áður en hann gekk á dyr. Mikill hiti var á fundinum enda mikið gengið á og mikið í húfi fyrir atvinnurekendurna.
Miklar umræður hafa spunnist um fundinn á samfélagsmiðlum og ekki síst um myndbandsupptökuna, sem blaðamaður Víkurfrétta tók.
Segir ein kona það óviðeigandi að taka upp „þennan hasar“. „Þarna er fólk jafnvel að horfa fram á að vera að missa allt sitt og eðlilegra eru það flóknar tilfinningar sem þarf að virða,“ segir hún.
Önnur kona, atvinnurekandi í bænum, segist hafa beðið blaðamanninn að hætta að taka upp þegar hún hafi verið að tala. „Þetta var ekki auglýstur opinn fundur. Mögulega hefðum við átt að gera athugasemd í upphafi að þú sem blaðamaður værir þarna,“ segir hún við blaðamanninn. Einnig. „Ef við hefðum viljað hafa fjölmiðla á staðnum þá hefðum við að sjálfsögðu kallað þá til.“
Blaðamaðurinn sagðist hins vegar hafa verið í rétti. „Ég var ekki að taka upp þegar þú baðst mig um það. Ég var hins vegar að taka upp þegar þú skipaðir mér að hætta því, það var klippt út. Ég dauðsé eftir því að hafa hlýtt því eins og hundur því blaðamaður má taka upp það sem honum sýnist,“ segir hann.
Þá segist fyrrnefndur veitingamaður hafa veitt blaðamanninum leyfi til þess að taka mynd en ekki myndband.
Blaðamaðurinn vísar þá í skilaboðasendingar á milli þeirra og að hann hafi ekki geta vitað að ekki mætti taka upp myndband. Segir hann einnig að veitingamaðurinn hafi heldur betur fórnað sér fyrir málstaðinn. „Ráðafólk virkilega tók eftir þessu og þetta var sem blaut tuska í andlitið á þeim!,“ segir hann.
Frekari umræður hafa spunnist um málið. Ein kona segir ömurlegt að taka svona upp og birta í fjölmiðlum.
Önnur spyr hvort blaðamaðurinn hafi verið boðaður á fundinn. „Er ég að skilja þig rétt á svörum þínum hér á þessum þræði að fréttamenn með „myndavél og myndatökuvél“ megi bara mæta hvert sem þeir vilja, m.a. á fundi sem ekki eru opnir og taka upp og birta?“ spyr hún.
Blaðamaðurinn segir þá að hann hafi fengið veður af fundinum í samtali við Guðrúnu Hafsteinsdóttur. Hann hafi ekki fengið boð um að koma á fundinn frekar en annað fjölmiðlafólk.
„Það hefði verið mjög auðvelt að segja mér þegar ég kom eða eftir fundinn, að ég fengi ekki leyfi til að fjalla um fundinn og þó, það er málfrelsi…,“ segir hann. Flestir hafi vitað að hann væri blaðamaður.
Einn af þeim sem voru á fundinum var þingmaðurinn Ásmundur Friðriksson, Sjálfstæðisflokki. Hann lýsti fundinum sem tilfinningaríkum.
„Á fundinum stóð hver fundarmaðurinn af öðrum upp og rakti sögu sína og raunir. Hér eru allir að tala frá hjartanu og vandi hvers og eins er þungur. Skammist ykkar, hættið að setja málin í nefndir, kaupið af okkur atvinnuhúsnæðið og gerið eitthvað. Það eru engir að taka af skarið og við fáum engin svör eru skilaboð fólksins,“ segir Ásmundur í færslu um fundinn á samfélagsmiðlum.
Einnig spyr hann hvers vegna Grindavíkurnefnd stjórnvalda hafi aðeins verið skipuð fólki úr stjórnsýslunni. Engum úr fyrirtækjarekstri, sem nefndinni var þó ætlað að hjálpa.
