Á vef Veðurstofunnar kemur fram að um 300 skjálftar hafi mælst frá því síðastliðinn mánudag en allt eru þetta skjálftar undir 2,0 að stærð.
„Aflögunargögn og líkanreikningar sýna að landris og kvikusöfnun undir Svartsengi er svipuð og síðustu daga. Þessi gögn sýna merki um það að kvikuþrýstingur sé áfram að aukast og er þetta svipuð þróun eins og vikurnar fyrir undanfarin kvikuhlaup og eldgos.“
Benedikt Gunnar Ófeigsson, fagstjóri aflögunarmælinga hjá Veðurstofu Íslands, segir í samtali við DV að það styttist í eldgos með hverjum klukkutímanum sem líður.
„En það er spurning hvað við þurfum að bíða lengi en þetta lítur nú ekki út fyrir að eiga langt eftir,“ segir Benedikt og nefnir hratt vaxandi skjálftavirkni og þá staðreynd að landris hafi haldið áfram en þó hægar en áður.
Benedikt segir ómögulegt að segja hvenær mögulegt eldgos hefst. Það geti gerst í dag eða um helgina og svo geti biðin orðið enn lengri. „Þetta lætur stundum bíða eftir sér en það getur ekki verið mjög langt í að eitthvað fari í gang,“ segir hann.
Aðspurður hvort meiri hætta sé á kröftugum atburði eftir því sem lengri tími líður segir Benedikt að það sé ein sviðsmynd sem þurfi að hafa í huga.
„Það er ekki víst en byrjunin gæti orðið öflugri og það gæti orðið meiri heildarhraunrúmmál, þannig að það er alveg smá áhyggjuefni. Það er ekkert víst að það verði en við verðum að vera tilbúin að svo verði.“
