Húsnæðis- og mannvirkjastofnun (HMS) hvetur neytendur til að gæta varúðar við kaup á vörum frá netverslunum utan Evrópu sem auglýsa vörur á samfélagsmiðlum sem eru töluvert undir  markaðsverði.

Þetta kemur fram í tilkynningu á heimasíðu stofnunarinnar en tilefnið er væntanlega mikil umræða að undanförnu um kínverska netverslunarrisann Temu. Þar er hægt að finna ógrynni af hræódýrum varningi, þar á meðal eftirlíkingar af þekktum hönnunarvörum eins og fjallað er um í Morgunblaðinu í dag.

Í frétt HMS kemur fram að stofnunin og önnur markaðseftirlitsstjórnvöld fylgist með því að vörur á íslenskum markaði uppfylli öryggiskröfur.

„Það er þó farsælast að neytendur séu meðvitaðir um eigin vörukaup og velji aðeins vörur sem þeir telja sig geta verið vissir um að uppfylli þær kröfur sem gilda um vöruöryggi innan EES-svæðisins.“

Bent er á að mikilvægt sé að neytendur séu gagnrýnir þegar kemur að “kjarakaupum” frá erlendum netverslunum og spyrji sig af hverju verðið sé svona lágt samanborið við evrópskar vörur.

„HMS bendir sérstaklega á að  mjög ódýrar vörur frá netverslunum utan Evrópu uppfylla að öllum líkindum ekki kröfur sem gerðar eru til þeirra í Evrópu. Nauðungarvinna við framleiðslu varanna getur líka skýrt lágt vöruverð.“

Þá segir að sérlega lág verð samanborið við sambærilegar vörur í öðrum netverslunum gefi vísbendingu um að hlutaðeigandi vörur hafi ekki verið prófaðar með tilliti til öryggisatriða. Neytendur ættu því að íhuga hvort barnaleikföng, föt, snyrtivörur og aðrar vörur gætu innihaldið efni sem eru bönnuð samkvæmt evrópskum stöðlum.