Það er kannski ekki bíllinn sem slíkur sem vekur ótta hjá samkeppnisaðilum, til dæmis í Bandaríkjunum, heldur er það verðið sem aðrir framleiðendur geta illa keppt við.
Nýr bíll kostar 12.000 dollara, tæplega 1,7 milljónir króna, og er bíllinn sagður ágætur til síns brúks með drægni upp á allt að 400 kílómetra. Einnig er hægt að fá ódýrari týpu með minni drægni og kostar nýr slíkur bíll um 10.000 dollara, 1,4 milljónir króna.
Í umfjöllun AP er bent á að sambærilegir bílar í Bandaríkjunum kosti allt að þrisvar sinnum meira og hefur þetta þegar valdið titringi í Bandaríkjunum.
Búist er við því að bandarísk yfirvöld setji jafnvel strax í dag ofurtoll á rafbíla sem fluttir eru til landsins frá Kína til að vernda bandarískan iðnað. Mun þetta væntanlega gera það að verkum að Seagull-bílarnir koma ekki til Bandaríkjanna strax að minnsta kosti.
„Þau fyrirtæki sem veita þeim (BYD) ekki athygli sem verðugur samkeppnisaðili mun verða undir í samkeppninni,“ segir Sam Fiorani, varaforseti AutoForecast Solutions. Sam telur að það sé ekki spurning um hvort heldur hvenær BYD kemst inn á bandarískan markað.
Hagsmunasamtökin Alliance for American Manufacturing hafa gengið svo langt að segja að kínverskir rafbílar geti gengið að bandarískum bílaiðnaði dauðum. Þeir sem starfa í bílaiðnaði hafa einnig áhyggjur og sagði Elon Musk, stofnandi Tesla, fyrr á þessu ári að kínverskir rafbílar væru það góðir að án viðskiptahindrana muni þeir slátra samkeppninni við nær alla aðra bílaframleiðendur í heiminum.
