Eldur kom upp í íbúð í Yrsufelli í Breiðholti í morgun. Tvær manneskjur voru inni í íbúðinni. Önnur komst út af sjálfsdáðum en slökkviliðsmenn hjálpuðu hinni út.

DV ræddi við Stefni Snorrason varðstjóra hjá Slökkviliðinu á höfuðborgarsvæðinu á vettvangi. Hann segir að tilkynning um eldinn hafi borist  um klukkan hálf tíu í morgun og að fylgt hefði tilkynningunni að tvær manneskjur væru í íbúðinni. Allt tiltækt slökkvilið hafi þá verið sent á vettvang:

„Þegar við komum á staðinn var annar einstaklingurinn kominn út úr íbúðinni og hinum var hjálpað út. Síðan voru þau flutt til meðhöndlunar á slysa- og bráðamóttökunni í Fossvogi. Eldurinn var slökktur svo reyklosum við ganginn.“

Stefnir sagði, þegar DV ræddi við hann, að verið væri að sinna öðrum íbúum í húsinu og reyna að koma þeim aftur til síns heima.

Hann segir að ekki hafi verið um mikinn eld að ræða en reykurinn hafi verið mikill. Hann hafði ekki upplýsingar um líðan fólksins sem var í íbúðinni og var flutt á Landspítalann í Fossvogi.

Myndband með viðtalinu við Stefni má sjá hér að neðan.

Bruni í Yrsufelli