Aðalsteinn Kjartansson, varaformaður Blaðamannafélags Íslands, segir að stjórn félagsins hafi ekki komið neinum málum áfram vegna tíðra vantraustsyfirlýsinga Hjálmars Jónssonar, þáverandi framkvæmdastjóra. Var það vegna skattamála Sigríðar Daggar Auðunsdóttur formanns. Einnig bað hún um sýndaraðgang að heimabanka félagsins.

Mannlíf greinir frá þessu.

Í samtali Mannlífs við Aðalstein kemur fram að ýmislegt hafi gengið á undanfarnar vikur og mánuði í starfsemi BÍ. Daglegur rekstur hafi gengið snurðulaust fyrir sig en stjórnin hafi ekki getað þokað neinum málum áfram vegna tíðra vantraustsyfirlýsinga Hjálmars á stjórnina. Er það vegna skattamála Sigríðar í tengslum við tekjur af Airbnb íbúðum.

„Hann hefur ekki viljað sættast á þá niðurstöðu stjórnarinnar sem lá fyrir strax síðasta sumar, um að ásakanir um skattalegt misferli formannsins væru ekki þess eðlis að við ætluðum að lýsa yfir algjöru vantrausti á öllum hennar störfum,“ sagði Aðalsteinn.

Einnig er greint frá því að Sigríður hafi beðið um sýndaraðgang að netbankaaðgangi félagsins. Hjálmar, sem hafi borið ábyrgð á fjármálunum, hafi verið mjög ósáttur við þetta.

Aðalsteinn sagði að það væri fullkomlega eðlilegt að stjórnarmeðlimur hafi aðgang að fjárhagslegum upplýsingum félagsins. Stjórnin hafi ákveðið þetta fyrir vikum síðan og hún beri endanlega ábyrgð á fjárhagsstöðunni.