Niðurstöður nýrrar bandarískrar rannsóknar hafa vakið töluverða athygli en rannsóknin snerist um áhrif grænmetisfæðis á fólk. Eineggja tvíburar voru fengnir til að taka þátt í rannsókninni. Annar þeirra var beðinn um að borða eingöngu grænmetisfæði í átta vikur en hinn var beðinn um að halda hefðbundnu mataræði þar sem grænmeti, kjöt og fiskur voru á borðum.

Niðurstaðan er mjög athyglisverð en hún sýndi að þeir tvíburanna sem borðuðu grænmetisfæði  höfðu margvíslegan heilsufarslegan ávinning af því. Kólesterólmagnið lækkaði sem og magn LDL-kólesteróls, blóðsykurinn komst í betra jafnvægi og þeir léttust.

Christopher Gardner, aðalhöfundur rannsóknarinnar, sagði í samtali við CNN að LDL-kólesterólið hafið lækkað um 10 til 15%, insúlín um 25% og þyngdartapið hafi numið 3% af líkamsþyngdinni. Þetta hafi gerst hjá þeim sem borðuðu eingöngu grænmetisfæði.

Hann sagði að grænmetisfæði geti innihaldið mikið af trefjum, vítamínum, steinefnum og plöntuefnum sem eru talin styrkja heilann, beininn, hjartað og augun og draga úr líkunum á alvarlegum sjúkdómum.

Fran Hu, prófessor í næringarfræði við Harvard háskólann, sagði að fólk þurfi ekki að gerast algjörar grænmetisætur til að njóta ávinningsins af slíku fæði. Það sé hægt að skera niður í kjötneyslu sem og neyslu annarra dýraafurða hægt og rólega.

Gardner sagði að ákveðinn ókostur hafi fylgt því að gerast grænmetisæta því þeir tvíburanna sem voru á grænmetisfæði voru ekki eins ánægðir og hinir vegna þess hversu þröngar skorður þeim voru settar varðandi mataræðið.