Á meðan Edda Björk Arnardóttir situr í haldi lögreglu eftir handtöku í fyrrakvöld ritar systir hennar pistil henni til stuðnings á heimasíðu Eddu Bjarkar. Systirin segir Eddu Björk hafa þolað óréttlæti fyrir norskum dómstóli.

Ekki er vitað hvar þrír synir Eddu Bjarkar eru niðurkomnir en hún hefur verið handtekin. Norskir og íslenskir dómstólar hafa úrskurðað að drengirnir skuli afhentir föður sínum í Noregi, sem fer með forræði þeirra. Systir Eddu Bjarkar segir:

„Hún missti forræðið yfir börnunum sínum í Noregi í rettarhöldum sem hún fékk ekki að taka þátt í! Það voru sem sagt réttarhöld þar sem hún var ekki boðuð né veittar upplýsingar um þar sem greinagerð frá lögmanni föðurs var lögð fram var það eina sem tekið var til greina. Ekkert lagt fram til sönnunar á því að það sem þar stóð væri satt. Enda flest í þessar greinagerð annað hvort hreinlega ósátt eða miklar ýkjur.

Lögin sem voru notuð til að staðfesta þetta eru ekki notuð í Noregi nema þegar um ræðir börn sem eru hreinlega í lífshættu af því að umgangast foreldri sitt.

Í engu réttarríki ætti þetta að vera hægt.“

Hún segir jafnframt að í öðrum gögnum hafi foreldrarnir verið metin jafnhæf og í einni skýrslu sé Edda Björk sögð betri í að hlusta á börnin og taka tillit til skoðana þeirra og þarfa. Samt sé niðurstaðan sú að börnin eigi að búa gegn vilja sínum í Noregi. Hún bendir einnig á að Edda Björk hafi unnið forræðismál gegn barnsföður sínum hér á landi varðandi forræði yfir dætrum þeirra. Þar hafi hún fengið fullt forræði.