Starfsmaður í öryggisleit á flugvelli sem var rekinn úr starfi eftir meintan þjófnað á 300 dölum, þremur peningaseðlum, frá flugfarþega og að hafa borðað seðlana staðhæfir að hann hafi aðeins verið að borða súkkulaði.

Þann 8. september síðastliðinn var karlmaður að nafni Cai á leiðinni í gegnum Manila Ninoy Aquino alþjóðaflugvöllinn á Filipseyjum. Farangur hans var skoðaður af konu sem var starfsmaður í öryggisleitinni og segir Cai að eftir skoðunina hafi hann áttað sig á að peningaseðlar voru horfnir úr veskinu hans.

Cai var á vellinum um klukkan 8.20 að morgni og axlartaska sem hann hélt á var tekin í skoðun. Cai fór yfir hvort að allt væri í töskunni hans á eftir en sá að hann vantaði 300 dali. Eftir rannsókn á málinu var konunni vikið úr starfi, eftir að hún var ákærð vegna málsins, þar sem eftirlitsmyndavélar sýna hana gleypa það sem yfirvöld telja nú að séu peningaseðlarnir. Í myndbandinu má sjá konuna gleypa eitthvað og taka síðan nokkrum sinnum vatnssopa úr flösku til að ná að kyngja því sem hún gleypti.

Hin ákærða neitar ásökuninni og segist í vitnisburði hafa verið að borða súkkulaði. Rannsakendur vísa því á bug þar sem enginn borði súkkulaði með þessum hætti, því þurfi ekki að kyngja niður með ítrekaðri vatnsdrykkju.

Konan hefur ekki verið handtekin vegna málsins, enda mun það ekki vera heimilt þar sem hún var ekki staðin bókstaflega að verki við að éta peninginn. Cai hefur ekki lagt fram kæru gegn konunni, en rannsóknin í málinu felur í sér að mál 14 annarra flugvallaröryggisvarða verða skoðuð.

Í öðru myndbandi má sjá konuna fara yfir tösku Cai og halda einhverju í vinstri hendi við mitti og snúa sér síðan til hliðar. Samstarfsmaður hennar réttir henni vatnsflösku og síðar má sjá yfirmann konunnar eiga í einhverjum samskiptum við hana, en svo virðist sem konan sé að kafna á peningaseðlunum. Yfirmaður konunnar og samstarfsmanni hennar sem gaf henni vatnið hefur einnig verið vikið úr starfi.