Grímur Grímsson, yfirmaður miðlægrar rannsóknardeildar lögreglunnar Höfuðborgarsvæðinu, staðfestir að banamein Karolis Zelenkauskas, var eitt höfuðhögg.

Karolis lést í kjölfar líkamsárásar á skemmtistaðnum Lúx í Austurstræti aðfararnótt 24. júní. Hann var 25 ára gamall litáískur ríkisborgari, hafði verið búsettur hér á landi um nokkurra mánaða skeið og var kærasta hans nýflutt til landsins.

DV greindi frá líkamsárásinni þann 25. júní og samkvæmt heimildum töldu vitni að maðurinn hefði látist vegna eins höggs í hnakka frá hinum grunaða. Bráðabirgðakrufning hefur staðfest að banameinið var eitt höfuðhögg.

Sjá einnig: Vitni telja að aðeins eitt högg í höfuðið hafi valdið mannslátinu

Söfnun hefur verið komið af stað til að flytja Karolis og kistu hans heim til föðurlandsins Litháen.

Sjá einnig: Karolis lést eftir banvænt högg á LÚX – Fjölskyldan safnar fyrir kistunni heim

Rætt var við Grím í kvöldfréttum Stöðvar 2 í gær. Aðspurður um hvort hvort banameinið hafi verið í eintölu svarar Grímur játandi og segir: 

„Bráðabirgðaniðurstaða úr krufningu liggur fyrir, sú niðurstaða leiðir í ljós að hann lést af völdum höfuðhöggs.“ Grímur segir í samtali við Stöð 2 mál af þessu tagi, þar sem maður deyr eftir aðeins eitt högg mjög sjaldgæf. Í fljótu bragði muni hann eftir tveimur málum sem komu upp með tiltölulega skömmu millibili fyrir nærri því 20 árum.

DV fjallaði um þau mál um helgina.

Sjá einnig: Manndráp á Íslandi – Eitt högg getur skilið milli lífs og dauða

Karlmaður á þrítugsaldri var handtekinn vegna árásinnar, en honum var sleppt úr haldi lögreglu í síðustu viku. Í tilkynningu lögreglu þá kom fram: Ljóst þykir að aðkoma þess sem setið hefur í gæsluvarðhaldi vegna rannsóknarinnar er með þeim hætti að skilyrði laga um meðferð sakamála, er lúta að gæsluvarðhaldi á grundvelli almannahagsmuna, eru ekki til staðar. Því var ekki gerð krafa fyrir héraðsdómi um áframhaldandi gæsluvarðhald og er maðurinn laus úr haldi.  Hann hefur áfram réttarstöðu sakbornings við rannsókn málsins.