Þeir komast ekkert áfram í sókn sinni. Víglínurnar hafa lítið breyst síðustu fjóra mánuði. Rússar þurftu að hörfa frá Kyiv. Þeir sæta refsiaðgerðum alþjóðasamfélagsins og eru að miklu leyti einangraðir á alþjóðavettvangi. Vesturlönd beita þá efnahagslegum refsiaðgerðum sem bíta illa. Í heildina hafa Rússar verið niðurlægðir síðustu sex mánuði. Í ljós kom að her þeirra, sem flestir töldu einn þann öflugasta í heimi, er illa búinn, hermenn eru illa þjálfaðir og stjórnun hersins virðist ekki vera upp á marga fiska. Ekki bætir úr skák að innrásin kom illa við Svía og Finna sem hafa nú sótt um aðild að NATO. Það þýðir að Rússar fá nú NATO-ríki í bæjarhlaðið.
En hver er staðan í stríðinu? Er því að fara að ljúka? Ekstra Bladet ræddi við nokkra sérfræðinga sem sögðu að svo sé ekki, reikna megi með að stríðið standi enn yfir eftir sex mánuði.
„Ég hallast að því að það verði enn stríð eftir sex mánuði. Kannski geta Úkraínumenn gert Rússana svo meyra að herdeildir þeirra brotna saman. Þá munum við sjá breytingar. En Rússarnir geta enn fengið refsifanga, fólk frá fátækum jaðarsvæðum og fólk í neyð sem er reiðubúið til að vera fallbyssufóður í stríðinu,“ sagði Jacob Kaarsbo, sérfræðingur hjá hugveitunni Tænketanken Europa og fyrrum sérfræðingur hjá leyniþjónustu danska hersins.
„Ég á erfitt með að sjá fyrir mér að Rússar setjist við samningaborðið. Þeir hafa sagt að þeir muni halda atkvæðagreiðslur á herteknu svæðunum. En það er óraunhæft að það verði gert á þessu ári. Það verður erfitt fyrir Pútín að láta hertekið land af hendi og Úkraínumenn virðast hafa styrkst. Þess vegna tel ég að það verði enn stríð eftir sex mánuði,“ saðgi Flemming Splidsboel, sérfræðingur í málefnum Rússland við Dansk Institut for Internationale Studier.
