Þetta er mat Tormod Heier, prófessors við norska herskólann. Í samtali við Norska ríkisútvarpið sagðist hann telja að Rússland hafi ekki verið svo viðkvæmt síðan í síðari heimsstyrjöldinni. Ástæðan er fjöldi mistaka sem Rússar hafa gert í stríðinu í Úkraínu.
Hann sagði að Rússar hafi gert fjölda mistaka í stríðinu og segist telja að þeir geti ekki unnið það með beitingu hefðbundins herafla.
„Er Rússland að tapa stríðinu í Úkraínu?“ var hann spurður og svarið var: „Já, það myndi ég segja. Þetta er stríð sem var heldur aldrei hægt að vinna hernaðarlega séð.“
Hann sagði að ef ráðist sé á annað land þurfi að hafa þrisvar sinnum fleiri hermenn en það til að geta sigrað. Það hafi Rússar ekki. „Með sína 190.000 hermenn hefðu þeir þurft að vera með að minnsta kosti hálfa milljón til að geta sigrað í stríðinu í Úkraínu. Af þessu sökum sáum við þá draga mjög úr markmiðum sínum eftir nokkrar vikur til að geta hertekið þau svæði í austurhluta Úkraínu sem aðskilnaðarsinnar höfðu á valdi sínu,“ sagði hann.
Hann sagði að þetta hafi því miður í för með sér aukna hættu á að Rússar beiti kjarnorkuvopnum. Ástæðan fyrir því sé að særður björn sé hættulegur björn.
„Markmiðið með hervaldi er að sækja fram pólitískt. En þess í stað eru Rússar orðnir einangraðri í Evrópu. Þeir hafa í grunninn tapað meiru en þeir hafa unnið,“ sagði hann.
