Heimsfaraldur kórónuveirunnar er í fullum gangi og hefur sótt í sig veðrið að undanförnu. Víða um heim fjölgar smituðu dag frá degi og heilbrigðisyfirvöld reikna með að faraldurinn muni enn sækja í sig veðrið í sumar og síðan bæta í þegar fer að hausta og fólk fer að vera meira inni við.

Samkvæmt nýrri breskri rannsókn, sem 17.500 manns sem höfðu greinst með COVID-19 tóku þátt í, þá eru það ákveðin sjúkdómseinkenni sem eru algengust þessa dagana hjá þeim smituðu.

BBC segir að samkvæmt niðurstöðunum þá sé hálsbólga algengasta sjúkdómseinkennið nú um stundir. Þar á eftir er höfuðverkur og síðan eru það stíflað nef og hósti sem hrjá fólk einna helst.

Í upphafi heimsfaraldursins var það mat breskra heilbrigðisyfirvalda að algengustu sjúkdómseinkennin væru hár hiti, missir bragð- og /eða lyktarskyns. En það hefur greinilega orðið breyting þar á samhliða því að veiran hefur stökkbreyst og þróast.

Samkvæmt niðurstöðum rannsóknarinnar þá eru þetta algengustu sjúkdómseinkennin þessa dagana:

Hálsbólga

Höfuðverkur

Stíflað nef

Slímlaus hósti

Nefrennsli

Hósti með slími

Hæsi

Hnerri

Þreyta

Beinverkir

Svimi

Bólgnir hálskirtlar

Breytt lyktarskyn

Brjóstverkir

Hiti

Hrollur eða skjálfti

Hlustarverkur

Missir lyktarskyns