Úrhellisrigning var í gær er samkoma til að minnast þeirra sem þurft hafa að þola tjón í umferðarslysum var haldin á Arnarnesbrúnni. Þá var liðið rétt ár frá því Anna Linda Bjarnadóttir lögmaður lenti í skelfilegu slysi á umferðarljósunum á þessum stað er ökumaður undir áhrifum áfengis fór yfir á rauðu ljósi og lenti í hliðinni á bíl Önnu Lindu.
Slysið hefur haft alvarlegar og langvarandi afleiðingar fyrir heilsu Önnu Lindu en hún greindi frá málinu í DV-hlaðvarpinu á laugardag.
Anna Linda ráðgerði, ásamt stuðningskonum sínum, að kveikja á 105 kertum á brúnni, en það er sá fjöldi umferðarslysa sem orðið hafa á þessum stað samkvæmt upplýsingum frá Vegagerðinni. Vegna úrhellisins var látið nægja að kveikja á einu kerti en ljósmyndari DV var viðstaddur og tók meðfylgjandi myndir.
„Veðrið setti stórt strik í reikninginn en stundin var engu að síður hátíðleg,“ segir Anna Linda, en nokkrir íbúar úr Garðabæ voru viðstaddir athöfnina þrátt fyrir slæmt veður. Margir kveiktu á kertum heima hjá sér kl. 19 í gærkvöld og voru með í anda.
„Það hafa orðið mikil viðbrögð við viðtalinu, Ég hef það á tilfinningunni að fólk sé búið að fá nóg af slysum og vilji taka höndum saman um betri umferðarmenningu,“ segir Anna Linda ennfremur.