Á síðasta ári létust 30% fleiri af völdum of stórra skammta af fíkniefnum og lyfjum í Bandaríkjunum en árið á undan. Í heildina létust um 93.000 manns af þessum völdum. Á síðustu 20 árum hafa um 900.000 manns látist af völdum neyslu of stórra skammta.

Eins og má kannski segja eðlilegt þá var það heimsfaraldur kórónuveirunnar sem sjónir fólks beindust að á síðasta ári og því féll ofneyslufaraldurinn svolítið í skuggann. Um 380.000 Bandaríkjamenn létust af völdum COVID-19 á síðasta ári og 93.000 af völdum ofneyslu lyfja og/eða fíkniefna.

Samkvæmt tölum frá bandarísku smitsjúkdómastofnuninni CDC þá hafa um 900.000 Bandaríkjamenn látist af völdum neyslu of stórra skammta frá 1999. Um hálf milljón af þessum dauðsföllum tengist neyslu ópíóíða en það eru mjög sterk verkjastillandi lyf sem stóru lyfjafyrirtækin markaðssettu af miklum krafti í upphafi aldarinnar og lengi vel eftir það.

Á síðari árum hafa ýmsar takmarkanir verið settar á sölu og dreifingu þessar lyfja og því hafa margir snúið sér að neyslu heróíns og fentanýls í staðinn.

70% af öllum dauðsföllum af völdum of stórra skammta eru meðal fólks frá 25 ára aldri upp í 55 ára. Til samanburðar má nefna að 65 ára og eldri eru um 80% þeirra sem hafa látist af völdum COVID-19 í Bandaríkjunum.