„Margir jarðfræðingar telja að jarðfræðilegir atburðir eigi sér stað tilviljanakennt í gegnum tímann en rannsókn okkar veitir tölfræðilegar sannanir fyrir ákveðinni hringrás sem bendir til að þessir jarðfræðiatburðir tengist og séu ekki tilviljanakenndir,“ segir Michael Rampino, jarðfræðingur og prófessor við New York University, í yfirlýsingu. Futurism skýrir frá þessu.
Fram kemur að niðurstaða rannsóknarinnar styðji þá staðreynd hversu langt tæknin er komin sem þörf er á til að dagsetja jarðfræðilega atburði sem áttu sér stað í fortíðinni. Á síðustu 100 árum eða svo hefur vísindamönnum tekist að þrengja hringinn mjög en í upphafi var talið að þessi atburðarás ætti sér stað á 26 til 36 milljón ára fresti.
Með nýjustu tækni gátu vísindamennirnir greint jarðfræðileg gögn sem ná allt að 260 milljónir ára aftur í tímann, þar á meðal 89 nákvæmlega tímasetta atburði. Meðal þessara atburða eru stór eldgos, súrefnisskortur í höfunum, stækkun lands og breytingar á sjávarstöðu.
Á þessum 260 milljónum ára áttu þessir atburðir sér stað á um tíu tímapunktum sem um 27,5 milljónir ára voru á milli. Niðurstaðan styður við niðurstöður vísindamanna við University of Sydney frá 2018 en þeir komust að þeirri niðurstöðu að þessi hringrás vari í um 26 milljónir ára.
Nú eru um sjö milljónir ára síðan atburðarás af þessu tagi átti sér síðast stað svo við getum andað rólega næstu tuttugu milljónir ára.
