Michelle Bachelet, mannréttindastjóri SÞ, segir að grípa þurfi til aðgerða vegna verstu skerðinga á mannréttindum sem hún hefur séð og nefndi í því sambandi stöðu mála í Kína, Rússlandi og Eþíópíu.

Mannréttindaráð SÞ heldur nú árlegt þing sitt en það stendur yfir til 13. júlí og fer fram á netinu. Á því verður fjallað um skýrslu Bachelet um kerfisbundinn rasisma og ályktanir um stöðu mála í Mjanmar, Hvíta-Rússlandi og Tigray héraðinu í Eþíópíu verða ræddar.

Í opnunarræðu sinni sagði Bachelet að hún hafi miklar áhyggjur af fréttum af „alvarlegum brotum“ í Tigray en þar geisa átök og um 350.000 manns eru í hættu á að verða hungursneyð að bráð.

Hún fór einnig yfir stöðuna í Mósambík þar sem aðgengi að matvælum verður sífellt ótryggara en tæplega 800.000 manns hafa neyðst til að flýja heimili sín vegna átaka en öfgasinnaðir múslimar láta mikið að sér kveða þar.

Hún nefndi einnig áhrif öryggislaga sem voru sett í Hong Kong til að bæla niður mótmæli lýðræðissinna. Lögin styrkja enn frekar tök stjórnvalda í Peking á Hong Kong sem í orði kveðnu nýtur ákveðins sjálfstæðis en minna er um það í raun. Hún ræddi einnig fregnir af mannréttindabrotum gegn Úígúrum í Xinjinag í Kína. Hún hafði verið undir miklum þrýstingi um að ræða um aðgerðir kínverskra stjórnvalda gegn Úígúrum en Bandaríkjastjórn hefur sakað þá um þjóðarmorð og glæpi gegn mannkyni. Að minnsta kosti ein milljón Úígúra hefur verið send í það sem mannréttindasamtök segja vera þrælkunarbúðir en Kínverjar segja vera endurmenntunarbúðir.