Einn stærsti tískuviðburður ársins, Met Gala, fór fram í gær. Þar kom saman rjómi elítu hinna ríku og frægu. Viðburðurinn í ár var þó nokkuð umdeildur þar sem auðkýfingurinn Jeff Bezoz og eiginkona hans, Lauren Sénchez, voru þar í lykilhlutverki sem heiðursformenn og styrktaraðilar. Talið er að Bezoz hafi eytt rúmum milljarði til að hljóta þennan heiður.
Mótmælendur hvöttu elítuna til að sniðganga viðburðinn þar sem Bezoz, sem er eigandi Amazon, er holdgervingur misskiptingar og vinnuréttarbrota. Höfðu mótmælendur einnig falið plastflöskur inni á Metrapolitian-listasafninu (Metsafnið), þar sem viðburðurinn fer fram, fullar af gulum vökva sem minnti á þvag.
Samkvæmt tilkynningu mótmælenda áttu þessar flöskur að tákna starfsfólk Amazon sem er beitt slíku harðræði að það fær ekki salernispásur og neyðist því til að pissa í flöskur á vinnutíma.
„Fyrirtæki Jeff Bezoz, Amazon, hefur bókstaflega verið kært fyrir að þvinga starfsmenn til að míga í flöskur. Amazon svíkur milljónir undan skatti og Bezoz er einn ríkasti maður heims. Metsafnið er að míga á sig fyrir að heiðra Jeff á Gala-viðburði sínum. Á meðan þau fagna milljarðamæringum Trumps skulum við hæðast að þeim.“
Tekið er fram að flöskurnar eru fullar af gerviþvagi, enda gjörningurinn táknrænn.
View this post on Instagram
