Stuðningsmenn Arsenal eru sagðir hafa skotið upp flugeldum fyrir utan hótel Atlético Madrid í London í nótt fyrir síðari leik liðanna í undanúrslitum Meistaradeildinni.
Liðin mætast á Emirates Stadium í kvöld þar sem sæti í úrslitaleik Meistaradeildarinnar er undir. Arsenal er talið í góðri stöðu eftir að hafa gert 1-1 jafntefli á Metropolitano-vellinum í fyrri leiknum í síðustu viku.
Samkvæmt fréttum voru flugeldar sprengdir ítrekað fyrir utan Courthouse Hotel í Shoreditch þar sem Atlético dvelur, og hófst látagangurinn um klukkan 1:30 eftir miðnætti. Talið er að uppákomurnar hafi raskað svefni margra leikmanna spænska liðsins.
Spænskir fjölmiðlar segja að Atlético hafi tilkynnt atvikið til UEFA og óskað eftir því að málið verði skoðað.
Atlético hafði valið annað hótel en það notaði í síðustu ferð sinni til London eftir 4-0 tap gegn Arsenal í deildarkeppni Meistaradeildarinnar í október. Spænskir fjölmiðlar sögðu breytinguna byggða á hjátrú, þó að þjálfarinn Diego Simeone hafi grínast með að ákvörðunin hefði einfaldlega verið tekin til að spara peninga.
