Fréttatilkynning frá lögreglu um Rauðagerðismorðið hefur verið yfirvofandi í dag en þegar til átti að taka inniheldur hún ekki eins mikil tíðindi og margir höfðu vænst.
Fram kemur að karlmaður á fimmtugsaldri hafi verið úrskurðaður í vikulangt gæsluvarðhald, eða til þriðjudagsins 2. mars, á grundvelli rannsóknarhagsmuna. Nafn mannsins kemur ekki fram í tilkynningunni en samkvæmt heimildum DV er um að ræða Íslendinginn Anton Kristin Þórarinsson.
Þeir menn sem losnuðu úr gæsluvarðhaldi í dag voru úrskurðaðir í tveggja vikna farbann, eða til þriðjudagsins 9. mars.
Albaninn Armando Beqirai, sem búsettur hafði verið á Íslandi í sjö ár, var skotinn til bana fyrir utan heimili sitt í Rauðagerði seint um laugardagskvöldið 13. febrúar. Skotið var mörgum skotum á Armando en þau hæfðu hann ekki öll. Talið er að notast hafi verið við hljóðdeyfi en það hefur ekki fengist staðfest.
Annar albanskur maður er í haldi lögreglu, grunaður um að vera skotmaðurinn, en hann hefur neitað sök. Sá maður gaf sig fram við lögreglu síðastliðið þriðjudagskvöld.
