„Ég hef séð fleiri deyja síðustu níu mánuði á gjörgæsludeildinni en á öllum mínum 20 ára ferli fram að þessu,“ sagði Amy Arlund hjúkrunarfræðingur á sjúkrahúsi í Fresno í Kaliforníu um ástandið í ríkinu af völdum heimsfaraldurs kórónuveirunnar en ástandið í ríkinu er mjög slæmt. Gavin Newsom, ríkisstjóri, varaði íbúana við því fyrir nokkrum vikum að gjörgæsludeildir sjúkrahúsa ríkisins verði fullar fyrir jól og nú virðist þessi svarta spá hans vera að rætast.

Rúmlega 16.000 kórónuveirusjúklingar liggja nú á sjúkrahúsum í ríkinu. AP segir að á sumum sjúkrahúsum séu gjörgæsludeildir nær fullar. Á meðan starfsfólk sjúkrahúsanna berst og reynir að veita sjúklingum nauðsynlega umönnun fjölgar smitum frá degi til dags. Í lok nóvember greindust tæplega 18.000 smit á dag. Í síðustu viku voru þau komin yfir 50.000 á dag. Þar af voru 16.000 í Los Angeles sem yfirvöld hafa sagt vera „nýja miðju“ faraldursins í Bandaríkjunum að sögn LA Times.

„Ef okkur tekst ekki að stöðva þessa aukningu munu sjúkrahúsin láta undan álaginu. Ef þú færð hjartaáfall, ef þú lendir í umferðarslysi, ef þú dettur niður úr stiga eða færð heilablóðfall þá verður kannski ekki laust sjúkrarúm fyrir þig,“ sagði Brad Spellberg, hjá USA Medical Center, á fréttamannafundi á föstudaginn.

Eric Garcetti, borgarstjóri í Los Angeles, tók í sama streng og sagði að hugsanlega þurfi að lýsa yfir neyðarástandi í borginni ef álagið á sjúkrahúsin eykst enn meira. Ef innlögnum fækki ekki á næstu þremur til fimm vikum þá láti heilbrigðiskerfi borgarinnar undan álaginu.

Um 300.000 sýni eru tekin á sólarhring í ríkinu. Fjöldi jákvæðra sýna er 11,8% að meðaltali á síðustu 14 dögum. Í Los Angeles var hlutfallið í síðustu viku 14%. Alþjóðaheilbrigðismálastofnunin WHO segir að ef hlutfallið sé yfir 5% sé faraldurinn stjórnlaus.