Bjarni Hilmar Jónsson, faðir stúlkunnar sem situr nú í fangelsi í Brasilíu vegna fíkniefnasmygls, er verulega ósáttur við ummæli Ara Jóhanns Sigurðssonar, annars forstöðumanna meðferðarheimilisins Háholts í Skagafirði. Bjarni hefur þegar rætt við ráðherra varðandi málið.

Eins og DV greindi frá í gær var fjöldi fólks verulega óánægt eftir að Ari kallaði parið, sem situr nú í fangelsi eftir að hafa verið handtekið með mikið magn kókaíns í Brasilíu undir loks síðasta árs, „þetta lið.“

Ari sagði í samtali við DV í gær að hann hafi fleygt orðum sínum fram á Facebook í kæruleysi og til að stuða fólk. Hann sagðist einnig ekki þekkja umrætt fólk og að orð hans á Facebook endurspegluðu ekki afstöðu hans sem forstöðumaður meðferðarheimilis.

Sjá einnig: Forstöðumaður meðferðarheimilis: „Kjaftæði að eyða skattpeningunum okkar í að aðstoða svona lið“

Bjarni segir að um algjöran dómgreindarbrest sé að ræða af hálfu Ara og telur hann vanhæfan til að sinna sínu starfi. Bjarni bendir á að málið sé afar erfitt fyrir fjölskylduna og hefur leitað til ráðamanna vegna ummæla Ara.

„Ég er búinn að tala við einn ráðherra. Það gerði ég í gærkvöldi. Hann benti mér svo á annan ráðherra sem fer með þennan málaflokk og mun ég funda með honum bráðlega,“ segir Bjarni í samtali við DV.

Bjarni segist ekki ætla að krefjast neins af ráðherra, sem mun vera Eygló Harðardóttir, félags- og húsnæðismálaráðherra, en vill að málið verið rætt og skoðað.

Varðandi mál dóttur hans, segir Bjarni að hann muni ekki ræða það við fjölmiðla að svo stöddu. Hann segist vera verulega ósáttur með umfjöllun fjölmiðla um málið, sérstaklega þar sem greint var frá því að dóttir hans hafi litið á sig sem fórnarlamb í málinu. Hann segir það vera alrangt.

„Það var ég sem sagði að hún væri fórnarlamb í málinu, ekki hún.“

Sjá einnig: Kókaínparið í Brasilíu: Faðir stúlkunnar óttast um hana – „Það líður öllum hræðilega“

Sjá einnig: Íslenskt par handtekið í Brasilíu með 4 kíló af kókaíni