Klukkan 17.30 í gær var maður kærður fyrir hótanir og líkamsárás í Kópavogi. Hann hafði að sögn veitt árásarþola áverka á hendi og bringu. Hinn kærði var farinn af vettvangi þegar lögreglan kom. En málinu var ekki þar með lokið því klukkan 18.10 réðust fjórir menn á einn í Kópavogi og veittu honum áverka. Árásarþolinn í því máli er hinn meinti gerandi í fyrra málinu.

Klukkan 01.20 í nótt hafði lögreglan afskipti af ökumönnum tveggja bifreiða í hverfi 105. Þeir eru grunaðir um kaup/sölu fíkniefna. Hvorugur vildi kannast við að hafa verið að selja fíkniefni en báðir sögðust hafa verið að kaupa þau efni sem fundust í bifreið annars.

Á áttunda tímanum í gærkvöldi var tilkynnt um innbrot/þjófnað í bílageymslu í Kópavogi. Þar var verkfærum stolið úr skáp.

Fimm ökumenn voru handteknir í gærkvöldi og nótt, grunaðir um að vera undir áhrifum áfengis og/eða fíkniefna.