Íslensk hjón á Vesturlandi duttu í lukkupottinn í Eurojackpot síðasta föstudag þegar þau unnu 124 milljónir króna. Þetta kemur fram í tilkynningu frá Íslenskri getspá.

„Það var ung kona á Vesturlandi sem fékk draumasímtalið sl. mánudag þegar starfsmaður frá Íslenskri getspá hringdi í hana og tilkynnti um vinning sem hún hafði fengið á áskriftarmiðann sinn í EuroJackpot.  „Ég er nú bara alveg steinhissa“ voru hennar fyrstu viðbrögð þegar henni var sagt að um væri að ræða vinning upp á rúmar 124 milljónir.“

Í tilkynningunni emur fram að konan og eiginmaður hennar séu búin að vera með miðann í áskrift undanfarið, eina röð sem kostar 300 krónur á viku.

„Þau eru að vonum alsæl með vinninginn og það öryggi sem hann veitir þeim inn í framtíðina og ætla þau að þiggja fjármálaráðgjöf sem vinningshöfum sem vinna milljónavinninga stendur til boða. Við minnum á að potturinn er fjórfaldur í þessari viku og stefnir í 5,4 milljarða og um að gera að smella sér á miða fyrir kl. 17:00 á föstudaginn.“