Guðmundur Hreiðar Guðjónsson lést í skelfilegu mótorhjólaslysi sunnudaginn 30. júní í sumarferð mótorhjólaklúbbsins Sturlunga MC og maka, hann var 28 ára. Slysið átti sér stað á Innstrandavegi við Hrófá skammt frá Hólmavík.
Á Facebook-síðu klúbbsins er Mumma, eins og hann var ávallt kallaður, minnst með hlýhug og rifjað upp að það hafi verið gæfuspor fyrir klúbbinn að leyfa ungum strákgutta að vera með þegar hann falaðist eftir að hjóla með klúbbnum.
„Hann lét ekki mikið yfir sér strákguttinn sem bankaði uppá hjá okkur fyrir nokkrum árum, í kuldagalla, með límband á skónum, hor út á kinn, á pínulitlu mótorhjóli og spurði svo hvort hann mætti nú ekki hjóla með okkur strákunum. Eitthvað sáu menn sérstakt við þennan strák strax í upphafi og tókum við það gæfuspor fyrir okkur að leyfa guttanum að vera með og sjá hvað hann entist.
Á næstu árum fengum við að sjá þennan dreng blómstra og breytast í þann eðalmann sem við þurfum nú að kveðja í hinsta sinn.“
Mannkostir Mumma eru rifjaðir upp og hann sagður hafa verið „brosmildur, hjartahlýr, einlægur, greiðvikinn, skrúfuglaður og góður vinur“
Jarðarför Mumma fór fram frá Víðistaðakirkju í Hafnarfirði laugardaginn 13. júli. Fjöldi vina hans og félaga í Sturlungum fylgdu vini sínum síðasta spölinn með hópreið og var hópkeyrslan tekin upp á myndband af Hero Productions Iceland. Myndbandið má sjá á Facebook-síðu klúbbsins.
Færsluna má lesa í heild sinni hér fyrir neðan.
DV vottar vinum og aðstandendum Mumma samúðarkveðjur.
