Álit skólanefndar Borgarholtsskóla var að engu haft þegar nýr skólameistari Borgarholtsskóla var ráðinn um mánaðamótin. Sá sem varð fyrir valinu, Ársæll Guðmundsson, hefur verið verkefnaráðinn í Menntamálaráðuneytinu frá því hann lét af störfum sem skólameistari Iðnskólans í Hafnarfirði – þegar skólinn sameinaðist Tækniskólanum.

Sjá einnig: DV spyr um ráðningu

Ragnar Þór Pétursson, fulltrúi menntamálaráðherra í skólanefndinni, hefur sagt sig úr nefndinni og sagt að málið angi af spillingu. Nefndin hafi fengið fyrirmæli um að skoða umsækjendur ekki of vel. Allir nefndarmenn komust sjálfstætt að þeirri niðurstöðu að annar umsækjandi væri hæfastur.

DV greindi frá málinu í febrúar og spurði þá um ráðningarferlið í ljósi þess að starfsmaður ráðuneytisins var á meðal umsækjenda. Illugi Gunnarsson menntamálaráðherra fól Ólöfu Nordal innanríkisráðherra að annast ráðninguna en sá kvittur hefur í allan vetur verið á kreiki, á meðal starfsmanna skólans, að til stæði að ráða Ársæl.

Sjá einnig: Skipa utanaðkomandi valnefnd vegna ráðningar

Ragnar segir í pistli sínum að hann hafi heyrt úr ýmsum áttum að „staðan væri eyrnamerkt Ársæli, sem væri innanbúðarmaður hjá Illuga og lykilmaður í hvítbókarvinnu hans.“

„Ég fullyrði þess vegna að það sé nánast útilokað að Ársæll hafi verið valinn af faglegum forsendum,“ skrifar Ragnar. Hann fullyrðir að ráðuneytið hafi ekki viljað að nefndin tæki viðtöl við umsækjendur eða kynnti sér málið of vel.

Ráða átti í stöðuna 1. apríl síðastliðinn en ráðningin dróst í tvo mánuði.