Úkraínska spillingareftirlitið gerði á föstudag húsleit hjá Andriy Yermak, starfsmannastjóri úkraínska forsetaembættisins og nánasta samstarfsmanni Volodymyr Zelensky forseta. Ekki hefur verið greint frá ástæðu aðgerðanna gegn Yermak en þær eiga sér stað um tveimur vikum eftir að umfangsmikil rannsókn hófst á meintum mútum í tengslum við mikilvæg orkuinnviðaverkefni í landinu stríðshrjáða. Sú rannsókn hefur þegar kostað tvo ráðherra embætti sín í Úkraínu og fest klær sínar í fyrrum viðskiptafélaga Zelenskýs.
Ljóst er að málið gýs upp á afar óheppilegum tíma fyrir Zelensky sem er undir miklum pólitískum þrýstingi útaf friðarviðræðum sem Bandaríkin stýra og byggist á hinu svokallaða 28 punkta áætlun sem sögð er hafa verið smíðuð í Washington.
Yermak hefur leitt úkraínsku samninganefndina í þessum erfiðu viðræðum við Bandaríkin í Genf. Hann staðfesti að húsleitin hefði átt sér stað í færslu á Telegram en þar sagðist hann vera samstarfsfús og rannsakendur hefðu fullan aðgang að öllu.
Zelensky hefur ítrekað lofað harðri baráttu gegn spillingu og hefur meðal annars rekið fjölda háttsettra embættismanna. Evrópusambandið og alþjóðastofnanir hafa áður hrósað Úkraínu fyrir að taka vandamálið föstum tökum en gagnrýni jókst í ár þegar forsetinn reyndi tímabundið að færa eftirlit NABU og SAPO undir ríkissaksóknara, ákvörðun sem hann neyddist til að snúa við eftir mótmæli.
Tilkynnt hefur verið að Andriy Yermak hafi sagt af sér.
