Samkvæmt enskum fjölmiðlum er fyrrum leikmaður Manchester United, Michael Carrick, orðaður við starf knattspyrnustjóra hjá Rangers eftir að Steven Gerrard ákvað að draga sig úr kapphlaupinu um starfið.

Rangers leita nú að nýjum stjóra eftir að Russell Martin var rekinn fyrr í mánuðinum, en liðið hefur byrjað tímabilið afar illa. Eftir aðeins einn sigur í sjö leikjum sitja þeir í áttunda sæti í skosku úrvalsdeildinni, ellefu stigum á eftir toppliði Hearts og níu stigum á eftir erkifjendum sínum í Celtic.

Martin, sem tók við liðinu í sumar, fékk harða gagnrýni frá stuðningsmönnum sem mótmæltu með borðum á leikvangi liðsins. Jafntefli gegn Falkirk var síðasta hálmstráið og var hann rekinn.

Gerrard, sem stýrði Rangers til síns fyrsta meistaratitils í tíu ár árið 2021, átti í góðum viðræðum við forráðamenn félagsins en hefur nú ákveðið að taka ekki starfið. Talið er að hann hafi viljað ráða meira um stefnuna á leikmannamarkaðnum.

Rangers hefur nú snúið sér að öðrum kostum, þar á meðal Kieran McKenna, stjóra Ipswich Town, og Danny Rohl hjá Sheffield Wednesday. En nafnið sem er einnig á blaði er Michael Carrick.

Carrick var rekinn frá Middlesbrough í júní eftir að hafa stýrt liðinu frá árinu 2022. Hann kom þeim í umspil B-deildarinnar á sínu fyrsta tímabili en náði ekki að fylgja því eftir næstu tvö ár. Carrick hefur einnig stýrt United tímabundið.

Carrick var orðaður við starf stjóra Manchester United í síðasta mánuði þegar þrýstingur jókst á Ruben Amorim, núverandi stjóra liðsins. Amorim hefur þó fengið traust eigenda, þar á meðal Sir Jim Ratcliffe, sem hefur haldið því fram að Portúgalinn haldi starfi sínu næstu þrjú ár.