Svandís Svavarsdóttir formaður Vinstri hreyfingarinnar-græns framboðs segir samstarf við aðra flokka lykilinn að því að flokkurinn nái árangri og í kjölfarið áhrifum í sveitarstjórnarkosningunum á næsta ári. Því verður ekki betur séð en að hún boði samstarf við aðra flokka.

Í kjölfar þess að flokkurinn féll af þingi í þingkosningunum á síðasta ári hefur mikið verið rætt um framtíð hans og hvort hann muni bjóða yfirhöfuð fram aftur. Oft hefur verið nefnt að vænlegasta leiðin fyrir Vinstri græn til að lifa af sé að taka upp samstarf við aðra flokka og bjóða þá fram í sameiningu með þeim. Sumir í flokknum hafa ekki tekið illa í slíkar hugmyndir og nú virðist formaðurinn kominn á þessa skoðun.

Svandís segir í færslu á Facebook að undirbúningur flokksins fyrir sveitarstjórnarkosningarnar sé hafinn og það hafi verið rætt í stjórn flokksins:

„Á föstudaginn var áttum við mikilvægan stjórnarfund þar sem við rýndum stöðuna í sveitarfélögunum og svæðisfélögunum okkar. Það er skýr þróun að fylgi VG er að mjakast hægt en örugglega upp á við – enda erindi okkar sterkt og skýrt, og það skilar sér!“

Þegar kemur að samtarfi við aðra flokka skrifar Svandís:

„Víða er nú þegar rætt um mögulegt samstarf við önnur stjórnmálasamtök til að tryggja sterk og samstillt framboð til sveitarstjórna í næstu kosningum. Þetta samstarf og samstaða eru lykillinn að árangri og áhrifum á næstu kjörtímabili.“

Leiðin fram á við fyrir Vinstri hreyfinguna-grænt framboð virðist því vera mörkuð. Stefnan er sögð að taka upp samstarf við aðra flokka vegna komandi sveitarstjórnarkosninga. Hversu víðtækt samstarfið verður, ef það tekst að koma því á, og til hversu margra sveitarfélaga það mun ná á hins vegar eftir að koma í ljós.