Tveir útivistarmenn í New York fylki í Bandaríkjunum hringdu í neyðarlínuna um síðustu helgi vegna þess að sá þriðji væri látinn á Cascade fjalli. Þegar að var gáð voru þeir í bullandi sveppavímu og félagi þeirra var sprelllifandi.

Tímaritið People greinir frá þessu.

Neyðarlínan fékk símtal laugardaginn 24. maí um klukkan 9 um morguninn. Á línunni voru tveir göngugarpar á Cascade fjalli, í norðausturhluta New York fylkis. Þeir sögðu að viðbragðsaðilanum sem svaraði að þriðji félagi þeirra væri látinn.

Cascade fjall er 1249 metra hátt og tilheyrir Adinondack fjallgarðinum. Fjallgöngur þar eru nokkuð krefjandi en þó vinsælar. Fólk má þar búast við að mæta öðru göngufólki allan ársins hring.

Landvörður var sendur út til göngumannanna og þegar hann fann þá kom í ljós hvert vandamálið var. Það var ekki að einn þeirra væri látinn heldur að þeir væru í annarlegu ástandi vegna vímuefnanotkunar. Það er að þeir hefðu innbyrt ofskynjunarsveppi og væru andlega komnir í aðra vídd.

Hringt var í þriðja göngumanninn sem reyndist vera sprelllifandi og ekki einu sinni slasaður. Landvörðurinn fylgdi svo hinum vímuðu vinum hans niður af fjallinu þar sem lögreglubíll og sjúkrabíll beið þeirra.