COVID-19 faraldurinn er stærsta áhyggjuefni þeirra fyrirtækja sem eru aðilar að Stoxx 600 hlutabréfavísitölunni. Fyrirtækin hafa miklar áhyggjur af að faraldurinn hafi neikvæð áhrif á afkomu þeirra. Það sem kemur kannski einna mest á óvart er að Brexit er í síðasta sæti yfir áhyggjuefni fyrirtækjanna þessa dagana.

Helmingur fyrirtækjanna hefur skilað ársfjórðungsuppgjöri og samkvæmt tilkynningum frá þeim þá er Brexit ekki ofarlega í huga þessa dagana. Á síðasta ári var Brexit eitt stærsta áhyggjuefni fyrirtækjanna auk viðskiptastríðs Bandaríkjanna og Kína.

Bank of America hefur safnað saman gögnum frá fyrirtækjunum um hvað þau telji að muni hafa neikvæðustu áhrifin á afkomu þeirra og hverju þau eiga von á restina af árinu.

Það þarf auðvitað ekki að koma á óvart að COVID-19 sé stærsta áhyggjuefnið. Þar á eftir eru áhyggjur af minni eftirspurn. Aðeinst tvö fyrirtæki af 279 nefndu Brexit sem áhyggjuefni.