Lögreglumenn í Arizona í Bandaríkjunum stöðvuðu för ökumanns á dögunum. Ökumaðurinn var ekki stöðvaður af neinni sérstakri ástæðu heldur var um að ræða reglubundna athugun lögreglu á ástandi ökumanna.

Í frétt ABC kemur fram að lögreglumenn hafi grunað að ökumaðurinn hefði eitthvað að fela þegar hann forðaðist augnsamband við lögreglumanninn sem ræddi við hann. Þá virtist ökumaðurinn óvenjulega taugaveiklaður, eins og hann hefði eitthvað að fela.

Lögreglumenn fengu leyfi til að leita í bílnum og þá kom í ljós að ökumaðurinn hafði sannarlega eitthvað að fela. Í bílnum fundust nefnilega fíkniefni sem metin eru á 3,7 milljónir dollara, rúmar 460 milljónir króna.

Meðal þess sem lögregla lagði hald á voru fleiri kíló af metamfetamíni, kókaíni, MDMA og THC.

Ökumaðurinn er þrítugur og heitir Logan Lewis Pederson. Hann er nú í haldi lögreglu og á væntanlega þungan dóm yfir höfði sér. Rannsókn á því hvaðan efnin komu og hvert þau voru að fara stendur enn yfir hjá lögreglu.