Hópur lögreglumanna í Skotlandi er grunaður um að hafa hefnt sín á lögreglukonum sem kvörtuðu undan kynferðislegri áreitni og kynferðislegu ofbeldi. Lögreglumennirnir eru þekktir fyrir að standa saman og gengur hópur þeirra undir nafninu „the boys club“.
Nú er verið að rannsaka hegðun þeirra og framgöngu. Þeir eru meðal annars sakaðir um að hafa læst barnshafandi lögreglukonu inni í herbergi og að hafa ekið með aðra út í skóg og skilið hana eftir þar. Það var uppljóstrari sem tilkynnti um málin til eftirlitsnefndar með störfum lögreglunnar. Rannsókn nefndarinnar hófst fyrir tíu mánuðum og stendur enn yfir.
Samkvæmt frétt STV News þurfti barnshafandi lögreglukonan að klifra út um glugga á Forres lögreglustöðinni eftir að hún var læst inni. Uppljóstrarinn sagði einnig að „the boys club“ hafi skilið aðra lögreglukonu eftir úti í skógi í hefndarskyni eftir að hún kærði fyrrum samstarfsmann sinn í lögreglunni fyrir heimilisofbeldi og kynferðisbrot.
Fram kemur að fleiri ásakanir á hendur lögreglumönnunum hafi komið fram eftir að eftirlitsnefndin hóf rannsókn sína. Þar á meðal eru þeir sakaðir um fyrirlitningu í garð samkynhneigðra.
