María Kjartansdóttir er nýr sjálfbærnistjóri Póstsins. Áfram verður lögð áhersla á að draga úr umhverfisáhrifum rekstrarins og axla samfélagsábyrgð með traustri og ábyrgri þjónustu um allt land, eins og segir í tilkynningu frá Póstinum.

„María býr yfir víðtækri reynslu þegar kemur að sjálfbærni og stefnumótun og hefur meðal annars leitt verkefni sem hafa snúið að upplýsingagjöf og innleiðingu laga, reglugerða og ýmissa staðla, þar á meðal á sviði umhverfisstjórnunar,” segir Gunnar Þór Tómasson, framkvæmdastjóri fjármálasviðs Póstsins.

María lauk MSc-gráðu í umhverfis – og auðlindafræði frá viðskiptafræðideild Háskóla Íslands, með áherslu á samfélagsábyrgð fyrirtækja og umhverfisstjórnun, og hefur starfað á því sviði í meira en áratug. Hún kemur til Póstsins frá Landsvirkjun þar sem hún starfaði sem verkefnastjóri í sjálfbærni og mun koma til með að vinna með starfsfólki Póstsins á mörgum sviðum, til að mynda fjármálasviði.

María segist spennt fyrir starfinu og komandi verkefnum. „Pósturinn gegnir mikilvægu hlutverki í samfélaginu og þar eru tækifæri til að draga úr umhverfisáhrifum og skapa aukið virði með markvissri sjálfbærnivinnu. Ég hlakka til að vinna með öflugu teymi Póstsins og halda áfram því metnaðarfulla sjálfbærnistarfi sem þar hefur þegar verið unnið.“