Tvö sakamál gegn Brynjólfi Löve Mogensen, öðru nafni Binna Löve, áhrifavaldi og fjölmiðlamanni, voru sameinuð í eitt. Í öðru málinu var hann sýknaður af ákæru um að hafa nauðgað Karlottu H. Margrétardóttur en í hinu var hann sakfelldur fyrir að hafa kýlt ónefnda konu og dæmdur í 30 daga skilorðsbundið fangelsi fyrir líkamsárásina.
Þetta herma heimildir Vísis sem meðal annars greinir frá Facebook-færslu Karlottu þar sem hún tjáir sig um fjögurra ára martröð og lýsir yfir miklum vonbrigðum með vinnubrögð lögreglu við rannsókn máls hennar, en atvikið sem ákært var fyrir átti sér stað árið 2021.
„Í fjögur ár hef ég þurft að bera þennan djöful með mér á hverjum degi, ef ég skyldi einhvern tímann þurfa að sitja í dómsal og segja mína sögu og fara yfir hvert einasta atriði aftur og aftur og aftur,“ segir Karlotta í færslu sinni.
Hún segist hafa kært Binna til lögreglu til að bjarga öðrum konum frá honum. Hún bendir á að hann hafi verið sýknaður vegna þess að ekki voru teknar skýrslur af vitnum fyrr en 13 mánuðum eftir kæruna og í einu tilviki eftir tvö ár. Taldi dómari að það væri allt of seint. Segir einnig í dómnum að skýrslurnar séu allar rýrar og standa hefði þurft betur að skýrslutökum. Karlotta segir ennfremur:
„Ekki nóg með að mér finnist réttarkerfið hafi brugðist með því að láta mig bíða í fjögur ár eftir þessari niðustöðu þá finnst mér lögreglan líka hafa brugðist og mér er virkilega misboðið vegna þessa alvarlegu og afdrifaríku mistaka hjá þeim. Ég er ekki sátt með niðurstöðu Héraðsdóms og vinnubrögð lögreglu í þessu máli eru til skammar.“
Brynjólfur, eða Binni Löve, hefur oft verið í fréttum gegnum árin vegna starfa sinna fyrir fjölmiðla, ástarlíf sitt og framgöngu á samfélagsmiðlum. Í frétt sem DV birti árið 2021, sama ár og meint brot hans gegn Karlottu átti að hafa verið framið, kom fram að Binni segðist reglulega fá óumbeðnar nektarmyndir frá konum. Á þessum tíma var hann vinsæll áhrifavaldur með tæplega 19 þúsund fylgjendur á Instagram.
