Máli héraðssaksóknara gegn Pétri Jökli Jónassyni, sem ákærður var fyrir hlutdeild í stóru kókaínsmygli, var vísað frá Héraðsdómi Reykjavíkur í morgun. Grundvöllur frávísunarinnar er óskýr tilgreining á ætlaðri hlutdeild Péturs í brotinu. Þetta staðfestir verjandi Péturs, Snorri Sturluson, í stuttu samtali við DV.

Pétur Jökull var eftirlýstur af Interpol að beiðni íslenskra lögregluyfirvalda vegna gruns um að hann hefði tekið þátt í stórur kókaínmáli sem dæmd var í á síðasta ári.. Fjórir menn voru sakfelldir í málinu og hlutu þunga dóma. Þyngsta dóm­inn hlaut Páll Jóns­son timb­ur­sali, níu ára fangelsi. Hann stóð að baki timb­ur­send­ing­unni frá Bras­il­íu sem haldlögð var í Hollandi og kókaíninu skipt út fyrir gerviefni. Magn efnanna var rétt tæplega 100 kg. Hinir sakborningarnir þrír fengu fimm til sex og hálfs árs fangelsi.

Fljótlega eftir að Pétur Jökull var eftirlýstur í vetur var álitið að hann væri viðriðinn stóra kókaínmálið og var það staðfest fljótlega eftir komu hans hingað til landsins 28. febrúar. Hann skilaði sér sjálfur til landsins en var handtekinn við komuna og úrskurðaður í gæsluvarðhald.

Gæsluvarðhaldið hefur verið framlengt nokkrum sinnum og tókst að gefa út ákæru rétt áður en hann hafði setið 12 vikur í gæsluvarðhaldi samfleytt en ekki má halda sakborningi lengur í gæsluvarðhaldi en þann tíma án þess að gefa út ákæru.

Ákærður fyrir tilraun til stórfellds fíkniefnabrot

Pétur Jökull er ákærður fyrir tilraun til stórfellds fíkniefnabrots með því að hafa ásamt hinum sakborningunum fjórum staðið að innflutningi á 99,25 kg af kókaíni hingað til lands frá Brasilíu með viðkomu í Rotterdam í Hollandi. Athygli vekur að hann er ekki ákærður fyrir peningaþvætti og skipulagða brotastarfsemi eins og hinir sakborningarnir fjórir.

Í ákæru er ekki verknaðarlýsing á þátttöku Péturs í málinu og kemur ekki fram hvað hann á að hafa nákvæmlega gert annað en að taka þátt í smyglinu. Pétur Jökull er ákærður fyrir tilraun til stórfellds fíkniefnabrots með því að hafa ásamt hinum sakborningunum fjórum staðið að innflutningi á 99,25 kg af kókaíni hingað til lands frá Brasilíu með viðkomu í Rotterdam í Hollandi.

Frávísunin verður kærð til Landsréttar sem kveður upp sinn úrskurð á næstu vikum.