Dýralæknar í Alaska fylki í Bandaríkjunum hafa staðfest að ísbjörn sem fannst dauður hafi drepist úr fuglaflensu. Þetta er í fyrsta skipti sem ísbjörn finnst dauður af völdum fuglaflensu.
Breska blaðið The Daily Mail greinir frá þessu.
Hræið fannst nálægt bænum Utqiagvik í norðurhluta fylkisins í október síðastliðnum. Það var Bob Gerlach, yfirdýralæknir Alaska, sem tilkynnti alþjóða dýraheilbrigðisstofnuninni, WOAH, að fuglaflensa hefði drepið björninn þann 6. desember.
„Þetta er í fyrsta sinn sem ísbjörn greinist með fuglaflensu nokkurs staðar,“ sagði Gerlach.
Venjuleg fæða ísbjarna eru selir en líklegast þykir að þessi ísbjörn hafi smitast af sýktu fuglshræi eða einhverju sem það snerti. Ekki er víst að björninn hafi endilega þurft að éta hræið til þess að smitast.
„Ef fugl drepst úr þessu getur veiran lifað í umhverfinu í þó nokkurn tíma, sérstaklega í köldu umhverfi,“ sagði Gerlach.
Í skunkum og selum
Þrátt fyrir að hafa fundist í spendýrum telur bandaríska sóttvarnarstofnunin, CDC, enn þá litlar líkur á að fuglaflensa ógni mannfólki. Auk ísbjarnar hefur fuglaflensa fundist í selum, skunkum, fjallaljónum, rauðrefum, þvottabjörnum og höfrungum.
Sjúkdómurinn hefur hins vegar borist hratt um margar tegundir villtra fugla og alifugla á undanförnum misserum. Meðal annars hefur faraldurinn valdið miklum skaða í hænsna og kalkúnabúum í Norður Ameríku og Evrópu.
