„Þá held ég að við eigum bara að ganga um í þessu landi eins og við gerðum fyrir þessa farsótt,“ segir Kári Stefánsson, forstjóri Íslenskrar erfðagreininar, við þeirri spurningu RÚV hvernig rétt að haga málum ef í ljós kemur að fáir veikist alvarlega af COVID-19. Sex eru nú á sjúkrahúsi með sjúkdóminn og vonir eru bundnar við að bóluefni veiti vörn gegn alvarlegum veikindum af völdum Delta-afbrigðisins.
„Ég held við hljótum að halda svolítið höndum um gamalmennin og þá sem eru með undirliggjandi sjúkdóma en ef mjög fáir verða mjög illa lasnir eftir svona viku þá er að minnsta kosti ástæða til að endurskoða mjög grannt hvernig við ætlum að beita sóttvörnum í landinu,“ segir Kári.
Kári segir að hann hefði kosið að við hefðum ekki hætt að skima þá sem koma bólusettir inn í landið og hann hefði kannski viljað fresta því um einn mánuð að opna landamærin en samt hafi verið allt í lagi að gera þetta svona. Hann áfellist ekki ríkisstjórnina fyrir hennar framgöngu.
„Ég held að það hafi samt verið allt í lagi að gera þetta með þessum hætti. Ég held að þessi tilraun sem er í gangi núna skipti miklu máli og ég held að það sé mjög erfitt að komast að skynsamlegri niðurstöðu án þess að hafa þau gögn sem verða til núna á næstu dögum.“