„Vissulega er það ekki nýtt að veður fari kólnandi þegar haustar. En umskiptin eru skýr að þessu sinni. Það sem af er október er hiti um 3 stigum yfir meðaltal október. Næstu daga og einkum í næstu viku verður hann hins vegar einu til tveimur stigum undir meðaltali.“
Þetta segir Einar Sveinbjörnsson, veðurfræðingur á Facebook-síðu Blika.is. Nú þegar komið er fram undir miðjan október er stutt í snjóinn og frostið. Ef marka má nýja langtímaveðurspá mun kólna hressilega á næstunni.
Í færslu á Blika.is segir Einar að loftmassahiti verði undir meðallagi frá 14. til 20. október næstkomandi. Hann verður 1 til 2 stigum frá októberhitanum sem er að jafnaði tæplega 6 stig í Reykjavík og rúm 5 á Akureyri. „ Höfum líka í huga að meðalhitinn lækkar hratt í október,“ segir Einar sem bætir við að það verði áfram rigningartíð norðan- og austanlands, frá Ströndum og austur á firði.
„En breytingin er sú að nægjanlega kalt verður fyrir snjó á fjallvegum og því vissara fyrir íbúa þar að huga að vetrardekkjunum, eigi menn t.d. leið yfir Fjarðarheiði eða Mývatns- og Möðrudalsöræfi, nú eða Öxnadalsheiði. Heldur ekki útilokað að snjóað gæti í byggð.“
Hér má sjá veðurspá næstu daga á DV.is