Fjórir 14 ára piltar urðu skelfingu lostnir eftir að fullorðinn einstaklingur ógnaði einum þeirra með hníf og henti öðrum harkalega í jörðina. Maðurinn var handtekinn og gisti í fangageymslum í nótt og er málið litið alvarlegum augum. Atvikið átti sér stað skammt frá Fylkisheimilinu í Árbæ. Valgarður Valgarðsson aðalvarðstjóri staðfesti að tilkynnt hefði verið um árásina.

Móðir eins piltsins segir í samtali við DV að drengirnir hafi verið í áfalli. Hún vildi ekki koma fram undir nafni, sonar síns vegna, sem óttast manninn. Maðurinn er af erlendu bergi brotinn en hefur búið hér á landi í nokkur ár, samkvæmt upplýsingum DV.

„Þeir voru fjórir saman og einn þeirra henti kínverja á eftir bílnum og segja strákarnir að hann hafi ekki farið nálægt honum,“ segir móðirin og bætir við að maðurinn sé á fertugsaldri. „Maðurinn stökk út úr bílnum og henti einum drengjanna í jörðina. Þá tók hann annan hálstaki, keyrði hann upp að tré og dró upp hníf og hótaði að drepa hann.“

Móðirin segir að maðurinn hafi otað hnífnum að síðu drengsins á sama tíma og hann hélt honum kverkataki. Par sem var að viðra hund sinn varð að sögn móðurinnar vitni að árásinni og fylgdu þeir piltunum í burtu. Einn þeirra myndaði bílinn og númeraplötuna. Þegar maðurinn varð þess var steig hann aftur út úr bílnum og hafði í hótunum við drengina sem voru í miklu áfalli.

Tveir drengjanna leituðu sér aðhlynningar á slysadeild. Lögreglan nýtti sér upplýsingar frá piltunum.

„Þeir voru með mynd af bílnúmerinu hans og hringdu á lögreglu þegar þeir komu heim til eins stráksins,“ segir móðirin: „Lögreglan náði strax að rekja bílnúmerið og fór á heimili mannsins og handtók hann.“

Valgarður Valgarðsson aðalvarðstjóri staðfesti í samtali við DV að það hefði átt sér stað uppákoma í þessa veru en vildi ekki fara nánar í atburðarásina. Þá sagði Valgarður að maðurinn hefði verið handtekinn á heimili sínu og verið yfirheyrður vegna málsins.