Kaffid.is greindi frá því í morgun að Sigmundur Davíð Gunnlaugsson, fyrrverandi forsætisráðherra og þingmaður Framsóknarflokksins hefði valdið töluverðum usla þegar hann afboðaði komu sína á hátíð Framsóknarfélags Akureyrar og nágrennis, til þess að fagna 100 ára afmæli Framsóknarflokksins. Hátíðin verður haldin á föstudaginn 16. desember næstkomandi í Þjóðleikhúsinu í Reykjavík.

Tilkynnti Sigmundur fjarveru sína til framsóknarmanna með smáskilaboðum og bauð þeim í leiðinni í veislu sína fyrir norðan föstudaginn 16. desember, eða sama dag og klukkutíma áður en hin hátíðin átti að eiga sér stað.

Fjölmiðillinn heyrði í nokkrum framsóknarmönnum og eru þeir sagðir ósáttir mjög með ákvörðun Sigmundar: „Svona gerir maður ekki! Eitt er jú að forfallast, það getur komið fyrir á bestu bæjum. En að bjóða jafnframt til eigin veislu á sama tíma og flokkurinn hefur auglýst 100 ára afmælishátíð, það er stríðsyfirlýsing!“ er haft eftir ónefndum forsvarsmanni Framsóknarflokksins í Norðurkjördæmi. Annar taldi að þetta útspil Sigmundar hlyti að hafa afleiðingar, mögulega þær að Sigmundur væri á útleið úr flokknum.

Þess má geta að eitt af erindum 100 ára afmælishátíðar Framsóknarflokksins í Þjóðleikhúsinu er ávarp Sigurðar Inga Jóhannssonar, sem hafði eftirminnilega betur í formannsslag þeirra Sigmundar Davíðs í september, en ljóst er að nokkur núningur hefur verið á milli þeirra tveggja.

Uppfært: 18:50

Ekki náðist í Sigmundur Davíð við vinnslu fréttar en hann hefur í tvígang eftir fréttir dagsins tjáð sig á Facebook-síðu sinni og gagnrýnir bæði frétt Vísis og DV. Þá bendir hann á að víða sé dagskrá á landinu tengt hátíðarhöldum.

„Það styttist í 100 ára afmæli Framsóknarflokksins, þann 16. desember, og rétt að minna á að af því tilefni verða hátíðarhöld víða. Auk uppfærslu í Þjóðleikhúsinu sem hefst kl. 18 verða ungir Framsóknarmenn með jólaglögg að Hverfisgötu 33 kl. 20. Haldið verður upp á afmælið í Lionssalnum við Skipagötu 14 á Akureyri kl. 17 og í Framsóknarhúsinu á Sauðárkróki kl. 20. Daginn eftir heldur afmælisveislan svo áfram m.a. með hádegisfögnuði í upphafsbæ flokksins, Seyðisfirði ofl. ofl. Annars er e.t.v. óþarfi að auglýsa á facebook enda hátíðarhöld vegna afmælisins þegar orðin tilefni frétta, m.a. með dæmalaust vitlausri ,,frétt“ eða ritgerð á Vísi sem virðist fyrst og fremst snúast um hugrenningar eða skoðanir blaðamannsins. 100 ára stjórnmálaflokkur ætti að sjá í gegnum slíkt.“