Segja má að Sigmundur Davíð Gunnlaugsson, formaður Miðflokksins, hafi brætt ótal hjörtu með því að birta mynd af sér með nýjan hvolp.

„Ég er yfirleitt feiminn við að vera á persónulegu nótunum en einstaka sinnum koma dagar sem þróast þannig að það verður freistandi að segja frá því,” segir hann í færslu á Facebook.

„Eftir allan hamaganginn vegna sveitarstj.kosninga og ESB umsóknar og eftir síðustu skyldur sem fylgdu þeirri orrahríð, í bili, hélt ég heim á leið.

Heima beið hvolpur sem ég gæti alveg vanist (þrátt fyrir smávægilegar efasemdir áður en hann mætti).”

Dagur Sigmundar varð enn betri þegar í ljós kom að í kvöldmatinn var lambalund og dóttir hans lagði til að horfa á sjónvarpsþættina sígildu um Sopranos fjölskylduna.

Flestar athugasemdir hafa verið á fallegu nótunum enda fullt tilefni til, við það bætast aðdáendur Sopranos.

Hundurinn eigi að vera íslenskur fjárhundur

Karen Kjartansdóttir, almannatengill hjá Veðurstofunni, gerir færslu Sigmundar að umfjöllunarefni í sinni færslu á Facebook, hún sé með eðlilega, málefnalega og öfgalausa kröfu: „Leiðtogi þjóðernisíhalds á Íslandi á að eiga íslenskan fjárhund. Ekki einhverja alþjóðlega stofutísku með mjúkan feld og evrópska og kúbverska tengingu.”

Hundurinn eigi að vera íslenskur fjárhundur, punktur. „Það gengur ekki að tala um þjóðlega sérstöðu, fullveldi og íslenska menningararfleifð og koma svo heim í lambalund, kartöflur, Sopranos og innfluttan hvolp. Það er bara Schengen með brúnni aldamótasósu,“ segir hún.

„Ég geri ekki margar kröfur. En ef íslenski fjárhundurinn er ekki nógu þjóðlegur fyrir stofu Sigmundar vinar míns, þá er fullveldið greinilega tollfrjálst og bara fyrir ræðupúltið.“