Kvikmyndastjarnan heimsfræga Arnold Schwarzenegger hefur verið sektaður um 35.000 evrur (tæpar 5,2 milljónir íslenskra króna) í Þýskalandi fyrir að skrá ekki sérstaklega lúxusúr sem hann kom með til landsins. Ætlunin var að bjóða það upp á uppboði til styrktar góðgerðarmálum.

Daily Mail hefur þetta eftir þýskum fjölmiðlum.

Þar kemur fram að leikaranum var haldið í nokkra klukkutíma á flugvellinum í München eftir að úrið fannst í fórum hans. Honum var þá tjáð að hann yrði að greiða helming sektarinnar í reiðufé og fylgdu tollverðir honum í banka þar sem hann tók féð út.

Arnold, sem er 76 ára, kom með flugi til München frá Los Angeles ásamt kærustu sinni, hinni 49 ára gömlu Heather Milligan, og ónefndum vini sínum. Hann mun hafa verið á leiðinni til Kitzbühel í Austurríki þar sem úrið átti að vera meðal muna á uppboði til styrktar góðgerðarmálefnum sem tengjast áhrifum loftslagsbreytinga. Arnold sem er bæði bandarískur og austurrískur ríkisborgari er sagður hafa verið í haldi þýskra yfirvalda í þrjá klukkutíma áður en honum var sleppt.

Úrið er sagt mjög verðmætt og var sérstaklega framleitt fyrir Arnold af svissneska úraframleiðandanum Audemars Piguet sem sérhæfir sig í lúxusúrum. Aðeins 1.500 eintök voru framleidd og er verðmæti hvers og eins úrs sagt nema andvirði 30.000 sterlingspunda (rúmar 5,2 milljónir íslenskra króna).

Tollverðir eru sagðir hafa tjáð Arnold að hann yrði að skilja úrið eftir hjá þeim. Talsmaður tollayfirvalda í München sagði að kvikmyndastjarnan hefði átt að gefa úrið upp til skatts þar sem til hefði staðið að selja það innan Evrópusambandsins. Ef slíkir munir séu fluttir til landa innan Evrópusambandins í þeim tilgangi að þeir verði þar eftir verði að gefa þá upp til skatts.

Arnold tjáði þýskum fjölmiðlum að málið væri dæmi um það vandamál Þýskalands að geta ekki séð skóginn fyrir trjánum.

Hann er mjög hrifinn af dýrum og vönduðum úrum og er sagður eiga álitlegt safn slíkra gripa.