Breski leikarinn Rupert Everett segist nú glíma við alvarlegar afleiðingar af viðleitni sinni til að ná líkamsbyggingu kyntákns á yngri árum.

Leikarinn, sem er 67 ára, á að baki fjölda vinsælla mynda, þar á meðal sem besti vinur Juliu Roberts í My Best Friend’s Wedding frá árinu 1997, en hann segir að líkamsbyggingin sem hann lagði hart að sér að ná hafi kostað hann mikið.

„Ég eyðilagði sjálfan mig,“ sagði hann við Guardian í viðtali sem birtist á mánudag. „Nú er ég næstum því lamaður vegna þess.“

„Ég nennti aldrei að gera hluti eins og að teygja, sem voru nauðsynlegir til að lyfta lóðum, því sinar manns verða sífellt stífari,“ hélt hann áfram. „Svo leiðinlegt. Ég gerði ekkert af því. Svo nú verður andlát mitt stoðkerfisbundið, held ég.“

Everett minntist vinsælda sinna sem kvikmyndastjarna: „Ég var  dásamlegur á einum tímapunkti. Ég hafði vöðva. Allt. Það var frekar skammlíft,“ bætti hann við. „Ég kalla það mitt Hollywood-ár.“

Everett viðurkenndi að hafa fundið fyrir óöryggi þrátt fyrir gott útlit jafnvel á hátindi vinsælda sinna.

„Vinnan snerist í raun um að sigla, að reyna að vera aðlaðandi,“ sagði hann. „Sem augljóslega kom frá þeirri tilfinningu að vera ekki nógu aðlaðandi. Hégómi minn snerist ekki um að spyrja: „Spegill, spegill á veggnum, hver er fegurstur allra?“. Hégómi er oft tilfinning um djúpt óöryggi frekar en að finna fyrir því hversu frábær ég er,“ bætti Everett við.

Everett stundar ekki lengur ræktina og segir að eina hreyfingin hans væri að ganga með labradorinn sinn. Hann er líka hættur öllu partýstandi og fíkniefnaneyslu.

Hann giftist eiginmanni sínum Henrique, brasilískum endurskoðanda, árið 2024.

„Ég hélt alltaf, þegar ég var enn að fara á klúbba og djamma, að ég yrði einn af þessum 75 ára í batik-dye bol á rave-hátíðum,“ segir Everett. „Ég hef varla áhuga á neinu lengur,“ bætti hann við. „Ég hef áhuga á rykögnum og þess háttar. Ég gæti alveg sætt mig við að sitja bara og horfa á vorið.“