Sigurjón Arnórsson, framkvæmdastjóri Flokks fólksins og aðstoðarmaður Ingu Sæland, ræður landsmönnum frá því að draga of víðtækar ályktanir af nýrri könnun Maskínu á fylgi flokkanna. Skoðanakannanir hafi sögulega vanmetið Flokk fólksins og ekkert tilefni til að ætla að annað eigi nú við þó að kosningar séu yfirstaðnar. Þetta kemur fram í grein Sigurjóns sem birtist hjá Vísi.
Maskína birti um áramót niðurstöður nýrrar könnunar á fylgi flokkanna og þar hafði fylgi flokksins dregist saman um rúm þrjú prósent, úr 13,8% niður í 10,6%. Margir drógu þá ályktun af þessu fylgistapi að kjósendur Flokks fólksins væru ekkert alltof sáttir með þær málamiðlanir sem Flokkur fólksins gerði í stjórnarviðræðum. Sigurjón bendir á að þessar tölur segi þó ekki alla söguna.
„Flokkur fólksins nær ekki inn á þing!“ var vinsæl fyrirsögn hjá fjölmiðlum í aðdraganda alþingiskosninganna árið 2021. Könnunarfyrirtækið Maskína birti reglulega kannanir sem spáðu að flokkurinn myndi ekki ná 5% fylgi í kosningunum. Ef svo hefði farið voru nær engar líkur á að flokkurinn fengi kjörinn þingmann. Ýmsir aðilar hvöttu kjósendur til að „sóa ekki atkvæði sínu“ í Flokk fólksins sem myndi hvort eð er ekki ná inn á þing og bentu á því til stuðnings niðurstöður skoðanakannana Maskínu“
Fyrir kjördag árið 2021 birti Maskína könnun og mældist flokkurinn þá með 6,1% fylgi. Upp úr kjörkössunum fékk flokkurinn þó tæp 9% sem þýddi að Maskína hafði vanmetið flokkinn verulega. Það sama á við um kosningarnar í ár. Maskína mældi fylgi Flokks fólksins 9,1% fyrir kjördag en upp úr kjörkassanum komu 14%. Aftur hafði Maskína verulega vanmetið flokkinn.
Fjölmiðlar hafi þó í engu minnst á þetta þegar fjallað var um nýjustu könnunina heldur var strax fullyrt að fylgi flokksins væri í frjálsu falli.
„Fyrirsögn Vísis og fréttastofu Stöðvar 2 var engu að síður: „Flokkur Fólksins dalar eftir kosningar.” En hvernig fékkst þessi fyrirsögn? Jú, nýjasta könnun Maskínu var nefnilega borin saman við það sem Flokkur Fólksins fékk upp úr kjörkössunum.
Engin tilraun var gerð til að benda á raunverulega hækkun á mældu fylgi Flokks fólksins um 1,5 prósent á milli kannana, né var því veitt athygli að Maskína hefur ávallt vanmælt fylgi flokksins stórkostlega. Heldur var ýjað að því að kjósendur flokksins væru ósáttir við flokkinn og stjórnarmyndun.“
Sigurjón segir nauðsynlegt að auka fagleg vinnubrögð mælingaraðila og draga úr villandi fréttaflutningi. Fjölmiðlar beri mikla ábyrgð enda geta fyrirsagnir og fréttir mótað almenningsálit. Nú þegar kjósendur eru farnir að kjósa með heilanum, eða taktískt, frekar en með hjartanu þá skipti vinnubrögðin enn meira máli.
„Það er bráðnauðsynlegt að auka bæði fagleg vinnubrögð mælingaraðila sem teikna ítrekað rammskakka mynd af almenningsáliti og samhliða því draga úr villandi fréttaflutningi. Fjölmiðlar bera mikla ábyrgð á því hvernig fyrirsagnir og umfjöllun móta almenningsálit og þjóðfélagsumræðuna og ættu að vanda verulega til verka. Margir kjósendur kjósa nú taktískt, sem gerir það enn varhugaverðara að setja of mikið traust á könnunaraðila eins og Maskínu sem hafa ítrekað sýnt miklar skekkjur – bæði með ofmælingum og vanmælingum á stjórnmálaflokkum.“
