Jake E. Lee, fyrrverandi gítarleikari hljómsveitar Ozzy Osbourne, var skotinn þrisvar sinnum þegar hann var úti að ganga með hundinn. Búist er við því að Lee nái fullum bata.
Gítarleikarinn Jake E. Lee, sem er 67 ára gamall, er þekktastur fyrir að hafa leikið með Ozzy Osbourne árin 1982 til 1987. Hann hefur einnig leikið á gítar með hljómsveitum á borð við Enuff Z´Nuff og Badlands en einnig sem sóló tónlistarmaður.
Lee var á gangi í heimaborg sinni Las Vegas um klukkan 2:40 aðfaranótt þriðjudags, 15. október, þegar hann varð fyrir árásinni. Fékk hann í sig þrjú skot, eitt í bringuna, eitt í handlegginn og eitt í fótinn.
Betur fór en á horfðist og kúlurnar fóru fram hjá öllum mikilvægustu líffærunum. Var Lee fluttur á spítala með fullri meðvitund. Að sögn bandarískra miðla er búist við því að hann nái fullum bata.
Lögreglurannsókn stendur yfir en enginn hefur verið handtekinn á þessari stundu. Talið er að skotárásin hafi verið algjörlega handahófskennd.
„Lögregla rannsakar nú atvikið og engar frekari upplýsingar verða veittar á þessari stundu. Lee og fjölskylda hans kunna að meta það að einkalíf þeirra sé virt á þessum tímapunkti,“ segir í yfirlýsingu lögreglunnar.
Ozzy Osbourne hefur lýst því yfir að hann sé í losti vegna fréttanna af árásinni á Lee.
„Ég hef ekki séð Jake E. Lee í 37 ár en ég er samt í losti yfir að hafa heyrt hvað kom fyrir hann í dag,“ sagði Ozzy í gær. „Þetta er enn ein fáránlega byssuárásin. Ég sendi hlýjar hugsanir til hans og fallegu dóttur hans Jade. Ég vona að það verði allt í lagi með hann.“
